Stefna Vinstrihreyfingarinnar – græns framboðs hefur aldrei átt ríkara erindi, segir Rósa Björk Brynjólfsdóttir, formaður flokksins. Hún hélt ræðu á flokksráðsfundi VG í Mosfellsbæ í dag þar sem hún ávarpaði félagsmenn og boðaði pólitíska endur
„Erindi okkar í VG hefur líklega aldrei verið mikilvægara heldur en núna, á tímum bakslags í kynjajafnrétti, á tímum stríðsátaka og hernaðarhyggju og á tímum þegar útlendingaandúð er sýnilegri meira en nokkru sinni fyrr víða í samfélaginu og þegar stöðugt er veist að mannréttindum fólks á flótta,“ segir Rósa í viðtali við fréttastofu.
„Þegar ríkisstjórn Íslands býr til brottvísunarbúðir fyrir fólk sem leitar eftir alþjóðlegri vernd og vill ekki láta senda sig burt komum við í Vinstri grænum til sögunnar með okkar skýru stefnu og okkar áherslu um sterka velferð og vernd um náttúruna og mannréttindi.“
Sterkari saman
Rósa Björk segir úrslit sveitarstjórnarkosninga hafa verið önnur og betri fyrir Vinstri græn en margir hafi spáð. Niðurstöðurnar sýni að rætur flokksins séu sterkar víða um land.
„Þegar heildarmyndin er skoðuð þá gekk okkur vel víða um land. Við buðum fram í átta sveitarfélögum og náðum á sumum stöðum bara mjög fínum og góðum árangri. En það eru líka skilaboð til okkar, frá kjósendum, sem sögðu að það væri ennþá þörf fyrir stjórnmálaafl sem berst kröftuglega fyrir félagslegu réttlæti, jöfnum tækifærum, öflugri velferð og vernd náttúrunnar.“
Kjósendur hafi sýnt að þessi sjónarmið skipti máli í bæjum landsins og í Reykjavíkurborg.
Vinstri grænir buðu fram með öðrum hreyfingum í nokkrum sveitarfélögum, í borginni og í Fjalla- og Borgarbyggðum. Aðspurð segir Rósa Björk að ekki hafi verið viðræður um frekari sameiningar á vinstri vængnum í kjölfar kosninganna.
„Það hafa ekkert verið neinar frekari viðræður um einhverjar sameiningar á vinstri vængnum. Þó að ég telji náttúrulega að við séum sterkari saman og það eru öll á vinstri vængnum velkomin til okkar í VG,“ segir Rósa Björk.
