Í Þetta helst í dag er sjónum beint að mögulegum breytingum á framkvæmdum sem tengjast samgöngum á höfuðborgarsvæðinu - en þau mál voru mikið rædd í aðdraganda kosninga og breytingum lofað.
Sjálfstæðisflokkurinn, Viðreisn og Samfylkingin undirrituðu á þriðjudaginn nýjan málefnasamning meirihluta bæjarstjórnar Hafnarfjarðar. Þar er það nefnt meðal helstu verkefna að fara fram á endurskoðun samgöngusáttmála höfuðborgarsvæðisins með tilliti til fjármögnunar og tímasetninga verkefna innan Hafnarfjarðar með það að markmiði að ná fram mikilvægum úrbótum í samgöngum í sveitarfélaginu.
Í gær var síðan myndaður nýr meirihluti Sjálfstæðisflokks, Viðreisnar og Framsóknar í Reykjavíkurborg og þar er svipaður tónn sleginn. Í samstarfssáttmála flokkanna þriggja segir að hefja eigi samtal við ríkisstjórnina og nágrannasveitarfélög um endurskoðun samgöngusáttmála höfuðborgarsvæðisins, fjármögnun hans og framkvæmdahraða.
Telur ákjósanlegt að endurskoða sáttmálann reglulega
Þorsteinn R. Hermannsson, framkvæmdastjóri Betri samgangna, félags sem hefur það hlutverk að hrinda í framkvæmd uppbyggingu samgönguinnviða í samræmi við sáttmálann, sem fyrst var skrifað undir 2019, en uppfærðan 2024, að viðbúið sé að endurskoða þurfi sáttmála sem þennan reglulega, „það mætti kannski segja að það væri góð vinnuregla að segja að við ætlum að endurskoða á fjögurra eða fimm ára fresti til að uppfæra tíma- og kostnaðaráætlanir,“ segir hann.
Pétur Marteinsson, oddviti Samfylkingarinnar, sagði í gær að hann hefði áhyggjur af breyttri stefnu í samgöngumálum. „Nýr meirihluti hefur boðað að það eigi að endurskoða samgöngusáttmálann. Mér finnst það boða meiri tafir og meiri umferð,“ sagði hann.
Seinkar framkvæmdum að hræra í sáttmálanum?
„Það fer í raun og veru eftir því hvernig þetta nálgast. Það er alveg hægt að ímynda sér sviðsmynd þar sem menn segja, nú stöldrum við við og ætlum að endurskoða allan pakkann og staldra við á meðan við erum að því. Það seinkar augljóslega eitthvað framkvæmdum ef það á að staldra alfarið við. Ef við erum meira að ræða verkefnin sem eru á seinni hluta sáttmálans, eitthvað sem á að gerast eftir 2030, þá er í raun og veru hægt að halda áfram á fullu með þau verkefni sem eru á fyrri hlutanum en ræða svo áfram á meðan um endurskoðun þess sem er að gerast eftir - hvað eigum við að segja - þetta kjörtímabil,“ segir Þorsteinn.
Hann segir að uppfærslan 2024 hafi leitt til þess að framkvæmdum seinkaði. „Þá var töluverð óvissa með tíma- og kostnaðaráætlanir og hvernig framhaldið yrði. Þá varð hik í raun og veru má segja í allavega ár, jafnvel tvö, á langflestum þessum verkefnum. Það þarf ekki að vera þannig. Það fer algjörlega eftir eðli uppfærslunnar eða endurskoðunarinnar,“ segir Þorsteinn.
Í Þetta helst í dag er nánar farið yfir sögu sáttmálans, fjármögnun, stöðu framkvæmda og mögulegar breytingar.
