Hlýviðrið sem leikið hefur við landsmenn mun ílengjast á landinu yfir helgina og þrátt fyrir úrkomu sunnan til er bjartviðris von fyrir norðan, sem og yfir firnindum hálendisins.
Á hálendinu er íshellan sem veturinn skildi eftir sig tekin að þynnast, og undan henni reigja Veiðivötn á Landmannaafrétt sig víða upp úr kafinu.
Ragnar Axelsson, ljósmyndari Morgunblaðsins um áratuga skeið, eða RAX eins og þjóðin þekkir hann best, festi þetta sjónarspil á myndir í vikunni þegar hann gerði sér ferð upp á hálendið og las úr því ýmis andlit og furðuverur.
Við honum blasti jörð og vötn sem voru í þann mund að losna undan snjófargi vetrarins, og fangaði hann augnablik þar sem snjórinn og síþynnandi ísbreiðurnar virtust renna saman við heiðarvötnin bláu.
„Þegar snjórinn er að fara af hálendinu verður það eiginlega eins og skákborð ofan frá,“ segir RAX í samtali við Morgunblaðið. „Það að koma fljúgandi þarna yfir frá borginni er eins og að koma allt í einu inn í aðra veröld. Þetta er alveg ótrúlega magnað.“
Öllu austar en Veiðivötnin var Langisjór, sem teygir sig um 20 kílómetra vegalengd suðvestur af Vatnajökli, enn rígbundinn klakaböndum, en umhverfis hann glittir á myndunum í biksvarta tinda Fögrufjalla og Hrútabjarga, Breiðbaks, Háskanefs og syðst Sveinstind.
Hin einstaka náttúra sem þarna er að finna er að miklum hluta til mótuð af eldhræringum á svæðinu, en mörg þeirra upp undir fimmtíu vatna sem finna má á svæðinu eru í raun sprengigígar sem mynduðust í Veiðivatnagosinu árið 1477.
Eldgosið skóp vatnaklasann í sinni núverandi mynd, en fjölmörg eldgos hafa orðið á Veiðivatnasvæðinu og mótað landslagið frá því að ísöld lauk.
Nafngift helstu vatna klasans gefa það ekki beint til kynna að þau hafi fyllt landnámsmenn álíka lotningu og þau gera nútímamennina, en þrátt fyrir nafngift vatnanna Ljótapolls, Ónýtisvatns og Hnausapolls fanga þau hug vegfarenda og veiðimanna sem að þeim leggja leið sína.
Með leysingunum mun svæðið taka að grænka og fjölskrúðugt fuglalíf við vötnin taka við sér, en svæðið er mikilvægur varpstaður himbrima, sem eigna sér þar á annan tug óðala ár hvert. Þá munu einhverjir farfuglar leggja leið sína upp á þessa perlu hálendisins til þess að ala unga sína.
Innan um fuglana munu veiðimenn brýna veiðarfærin og freista gæfunnar, þar sem vötnin gefa af sér vænasta urriða og í auknum mæli bleikju á undanförnum árum, sér í lagi í þeim vötnum sem eiga samgang við Tungnaá.
Stangveiði er mikið stunduð í vötnunum, en snemma árs fengu fastir viðskiptavinir í Veiðivötnum að tryggja sér veiðileyfi fyrir sumarið.
