„Ég sef í galla­buxum“ - Vísir

Blaðamaður ræddi við Úlf um hans persónulega stíl, fataskápinn, boð og bönn og fleira slíkt.

Hvað finnst þér skemmtilegast við tískuna?

Ég elska hvernig þú getur búið til þinn eigin karakter sem þú getur skreytt og breytt. Það klæðast allir fötum en það er svo háð aðstæðum hversu skapandi þú getur verið. Það er svo frelsandi að hægt er að tryggja æðislegan dag bara með því að klæða sig skemmtilega upp og sýna heiminum hver þú ert.

Hver er uppáhalds flíkin þín og af hverju?

Flíkin sem ég held næst mér er peysa sem amma mín prjónaði fyrir mig. Hún endurgerði peysu sem mamma hennar prjónaði fyrir börn hennar en breytti henni smá svo ég myndi fíla hana meira. Hún var ótrúlega skapandi og efnileg í öllu og er svo þakklátur að seinasta verkefni hennar var fyrir mig.

Eyðirðu miklum tíma í að velja föt hverju sinni?

Já eiginlega allt of miklum, ég enda nánast alltaf að vera smá seinn. 

Ég vil bara ekki vera meðal almennings þegar ég er ekki skarplega klæddur.

Hvernig myndirðu lýsa stílnum þínum?

Hann er alltaf að breytast en blueprint-ið í flestum outfittum er flottur jakki, svona tveir bolir, trefil og væntanlega gallabuxur. 

Ég sef í gallabuxum. 

Ég elska þegar föt líta út fyrir að vera gömul, eru smá rifin og eyðilögð. Fötin mín eru flest í frekar daufum tónum en af og til hendi ég inn sterkum lit.

Hefur stíllinn þinn breyst mikið í gegnum tíðina og hvernig þá?

Já hann er sífellt að breytast. Ég fæ ógeð af fötunum mínum á svona fimm mánaða fresti og sel þau öll en ég nota þann pening til þess að kaupa mér ný. Með því að halda þeim flottustu og flíkum sem fara mér best er ég hægt og rólega að þróa minn stíl og framtíðar fataskáp.

Nýturðu þess að klæða þig upp?

Já það er svo mikil hugleiðing, þegar ég hef ekkert að gera þá fer ég oft að máta „outfit“ til þess að vera með einhver tilbúin í hugmyndabankanum. Það er alltaf gaman að setja saman flott look fyrir skemmtileg tilefni en af hverju ekki að gera það á hverjum degi?

Hvað skiptir þig mestu máli í klæðaburði?

Þegar ég er að klæða mig þá pæli alltaf fyrst í sniði og litum og vinn mig bara í gegnum það. Það hvernig allt virkar saman skiptir mig meira máli heldur en einhver ein statement flík.

Hvaðan sækirðu innblástur í tískunni?

Fyrir minn persónulega stíl þá kemur innblásturinn oft án þess að ég taki eitthvað sérstaklega eftir honum. Yfirleitt er það fólk, vinir, kvikmyndir, tímabil og búningar sem hafa áhrif á mig og enda á því að bæta í fataskápinn.

Ertu með einhver boð og bönn þegar það kemur að klæðaburði?

Það er alltaf flott að vera í eftirminnilegum og einstökum jakka, það er grunnurinn að góðu outfitti. Varðandi bönn þá reyni ég alltaf að forðast microtrends, það sýnir skort á persónulegum stíl.

Áttu eitthvað eftirminnilegt tískuslys?

2020 var ár margra tískuslysa og ég held að ég sé ekki einn á því.

Spilar álit annarra eitthvað hlutverk í þínu fatavali?

Væntanlega vill maður að fólk sjái sitt „vision“ en það er tilgangslaust að velta sér upp úr því. 

Það er alltaf betra að vera manneskjan sem þorir að klæða sig vel og líta vel út frekar en að vera súr úti í horni og dæma allt og alla.

Hver er eftirminnilegasta flík sem þú hefur klæðst og af hverju?

Flíkin sem stendur alltaf upp úr hjá mér er útskriftarfötin sem ég saumaði fyrir útskriftina mína árið 2024. Þar saumaði ég jakka sem átti að vera nútíma útgáfa af þjóðbúningum. Ég saumaði svo líka leðurbuxur við jakkann.

Hvað finnst þér heitast fyrir 2026?

Að vera „overdressed“ alltaf og alls staðar.

Býrðu yfir einhverju góðu ráði þegar það kemur að tísku?

Að stíga úr þægindarammanum, þora að prófa og vera skrítinn í smá mun einungis styrkja mann og mynda framtíðar-stílinn.