Stjórnvöld í Rússlandi vöruðu Breta við því í gær að þeir myndu gjalda fyrir drónaárásir með drónum sem framleiddir voru í Bretlandi en notaðir í árásum Úkraínumanna í Rússlandi.
The Sunday Times greindi frá því um helgina að tvö bresk fyrirtæki hefðu framleitt dróna sem hefðu verið notaðir í Kyiv til langdrægra árása á hernaðarlega innviði og iðnaðarbyggingar í Rússlandi.
Í tilkynningu sem rússneska sendiráðið í London sendi frá sér saka Rússar Bretland um að vera í vitorði og samverknaði með Úkraínu og hafa viljandi stigmagnað átökin. Þeim mun meiri sem þátttaka Breta er í átökunum og stuðningur, þeim mun meira þurfa þeir að gjalda fyrir það, segir í yfirlýsingunni.
Samkvæmt The Sunday Times er annað fyrirtækjanna sem framleiðir drónana dótturfélag vopnaframleiðandans BAE Systems. Dagblaðið gaf ekki upp hvert hitt fyrirtækið væri og bar fyrir sig að það væri gert af öryggisástæðum.
Heimildarmenn The Sunday Times í úkraínska hernum staðfestu notkun breskra dróna í árásum síðustu sex mánuði. Meðal skotmarka voru olíuhreinsunarstöðvar í Volgograd í suðvestur Rússlandi og Yaroslavl nærri Moskvu.
Bretland hefur verið einn öflugasti bakhjarl Úkraínu síðan Rússar hófu innrásina í febrúar 2022 og lagt fram um 25 milljarða punda til stuðnings Úkraínum, þar af um 16 milljarða punda í hernaðarlega aðstoð.
