Enn er minka leitað, eftir að hundruð, jafnvel þúsundir þeirra sluppu úr loðdýrabúi í Mosfellsdal í gær. Minkabóndinn segir bændur óttast fleiri skemmdarverk og innbrot, margir forvitnir hafa lagt leið sína í Mosfellsdal.
Margir hafa lagt Ásgeiri Péturssyni minkabónda í Dalsbúi í Mosfellsdal lið, eftir að skemmdarverk voru unnin á búi hans þarliðna nótt og minkunum hleypt út úr búrum sínum.
Margir hafa rétt hjálparhönd
Um 12.000 dýr voru í búinu - ekki liggur fyrir hversu mörg hafa verið drepin eða hversu mörg eru komin aftur í hús.
Í gær glumdu byssuskot um Mosfellsdal þar sem verið var að skjóta minka, sem komist höfðu út fyrir öryggisgirðingu umhverfis búið og minkar hafa líka verið skotnir þar í dag.
Ásgeir segir marga hafa rétt hjálparhönd. „Það hefur verið hringt í mig alls staðar að af landinu. Ekki bara til að bjóða mér hjálp,“ segir Ásgeir sem segir fjölmarga bændur hafa áhyggjur af eigin stöðu, að brotist verði inn í bú þeirra.
Og það eigi einkum við bændur sem eru með svína- og kjúklingabú.
Þrjú innbrot í eldisbú á nokkrum vikum
Innbrotið í Dalsbú er þriðja innbrotið í eldisbú síðan í maí. Lögregla segir engan hafa verið kallaðan í skýrslutöku vegna hinna tveggja og segir ekki ólíklegt að málin þrjú tengist.
Fyrir ári samþykkti Evrópusambandið bann við minkarækt sem tekur gildi á næsta ári. Ásgeir segir það hafa komið af stað neikvæðri umræðu um greinina, og hafi leitt til hálfgerðs skotleyfis á bændur.
Hann er viss um að málin þrjú tengist. „Og þetta eru ekki einu innbrotin sem eiga eftir að eiga sér stað.“
Á hverja ræðst þetta fólk næst?
Í nágrenni Dalsbús er húsdýragarðurinn á Hraðastöðum. Bjarni Bjarnason, eigandi hans tekur undir áhyggjur Ásgeirs. „Hvað næst? Það hafa allir áhyggjur af þessu. Á hverja ræðst þetta fólk næst?“ spyr Bjarni.
Enginn minkur hefur sést í þéttbýli, íbúar í Mosfellsbæ eru beðnir um að halda köttum sínum inni og íbúum í nágrenni Dalsbús er ráðið frá að láta börn sofa úti í vögnum.
Bjarni hefur engan mink séð á sinni jörð, en hefur aftur á móti séð talsvert af forvitnu fólki sem leggur leið sína í dalinn til að freista þess að sjá minka.
„Mig langar til að vita hvað fólk langar til að sjá. Örvinglaðan bónda? Eða skotinn mink? Ég er ekki alveg að skilja þetta, en fólk er forvitið.“
Óboðleg meðferð á dýrum
Trausti Hjálmarsson formaður Bændasamtaka Íslands segir þetta óboðlega meðferð á dýrum, að hafa sleppt þeim úr búrum sínum. „Við fordæmum það sem hefur átt sér stað á þessum þremur búum í vor og sumar. Við erum orðin langþreytt á þessu ástandi.“
Trausti segir að stöðva þurfi þá sem beri ábyrgð á innbrotunum og skemmdarverkunum. Verið sé að skoða hver beri fjárhagslega ábyrgð í tilvikum sem þessum.
Er þetta hinn nýi veruleiki íslenskra bænda?
„Við verðum, með öllum ráðum, að koma í veg fyrir að þetta haldi áfram. Bændur eru eðlilega orðnir mjög stressaðir yfir því að hver verði næstur og farnir að velta fyrir sér hvort þetta sé orðinn hinn nýi veruleiki íslenskra bænda. Að vera með vöktunarkerfi inni og utan á öllum gripahúsum til að verjast ytra áreiti á borð við þetta,“ segir Trausti.
