Atli Bollason, listamaður, er hneykslaður á því að vinur hans fái ekki ríkisborgararétt. Hann hafi beðið í þrjú ár, stofnað hér fyrirtæki og fjölskyldu en sé sífellt látinn fylla út fleiri pappíra.
„Ég get ekki orða bundist. Fyrir mánuði berst vini mínum þessi tilkynning: um að ÞRIGGJA ÁRA GÖMUL umsókn hans um ríkisborgararétt þarfnist „frekari skoðunar“ og fyrirsjáanlegt sé að „afgreiðsla máls muni tefjast vegna þess.““ segir Atli í færslu á samfélagsmiðlum. En auk þess að stunda list á ýmsum sviðum, þá hefur hann margoft látið sig þjóðfélagsmálefni varða í greinaskrifum.
Með fyrirtæki og fjölskyldu
Birtir hann nafnhreinsaða mynd af bréfinu sem vinur hans fékk frá Útlendingastofnun. En þar er tilkynnt um töf á afgreiðslu umsóknar.
„Síðan viðkomandi kom til landsins hefur hann stofnað fyrirtæki, hann er með fólk í vinnu, hann hefur gift sig og eignast börn og – ég nefni það því það er honum mjög mikilvægt – aldrei þegið bætur. Með öðrum orðum: Hann er líklega betri þjóðfélagsþegn heldur en ég og þú,“ segir Atli.
Segir Atli að vinur sinn sé búinn að þreyta próf og þeysast þvers og kruss um heiminn til að safna gögnum, sem sífellt sé gerð meiri krafa um. Fyrir utan að ætla sér að eiga hér heimili og líf alla ævi á Íslandi þá er ein helsta ástæða fyrir því að hann sækir um ríkisborgararéttinn ferðafrelsið.
„Í alvörunni: Hvað er að? Er ríkisstjórnin of upptekin við að smíða fangelsi fyrir börn flóttamanna? Er verið að efnagreina pappírinn? Endurraða erfðaefni?“ spyr Atli.
Ömurleg stjórnsýsla
Segist hann hafa sjálfur hringt í Útlendingastofnun til að fá upplýsingar um það á hverju umsóknin strandar. En leyfissérfræðingarnir veiti ekki viðtöl í síma.
„Það er allt gagnsæið, öll trúin á ferlana. Mér er alveg sama hvar maður stendur í pólitík; þetta er í besta falli ömurleg stjórnsýsla, í versta falli grimmdarleg mannvonska. Þetta kerfi er ekki að virka – af hverju er enginn að laga það? Til hvers eru eiginlega stofnanir sem vinna á móti umbjóðendum sínum?“ segir hann að lokum.
Málin eigi að vera hjá Þjóðskrá
Hefur færslan fengið mikil viðbrögð. Meðal annars frá Helga Hrafni Gunnarssyni, fyrrverandi þingmanni Pírata, sem nú er genginn til liðs við Viðreisn.
Mynd/Sigtryggur Ari
„Þetta er vegna þess að Útlendingastofnun er ónýt. Það er ekkert hægt að gera við þessa stofnun annað en að leggja hana niður og byrja upp á nýtt,“ segir Helgi. „Reyndar finnst mér að þessi mál ættu bara að vera hjá Þjóðskrá (eins og EES-málin), en ef það þykir ekki nógu fínt, þá þarf allavega að loka Útlendingastofnun og setja á fót alveg nýja stofnun, með nýja kennitölu og nýja stjórn. Það er ekki hægt að laga hana, því að hún er ekki bara biluð, hún er ónýt. Jafnvel ef hún væri endurbyggð á sama lagalega grunni, þá myndi það bæta ýmislegt strax, bara við það eitt að vera ekki þessi stofnun.“
