Miklar umræður hafa skapast meðal Mosfellinga eftir að inngildandi framfarafáninn var málaður á göngu- og hjólabrú yfir Vesturlandsveg.
Mynd af brúnni var birt í Facebook hópnum Mosó – bærinn okkar, þar sem framkvæmdinni var hrósað og hún sögð vera flott framtak hjá bænum og austari brúin sögð vera orðin sannkölluð Bifröst, sem vísar í regnbogabrúna frægu úr norrænni goðafræði.
Viðbrögðin voru fjölbreytt og skiptust menn mjög í tvær fylkingar um útlit brúarinnar og skilaboðin að baki framkvæmdinni, en margir viðruðu aðrar áhyggjur vegna framkvæmdarinnar.
Óttast að brúin verði hál í rigningu
Á meðal þeirra athugasemda sem vöktu athygli voru áhyggjur af því hvort málningin á göngu- og hjólafletinum gæti gert brúna sleipa þegar yfirborðið blotnar.
„Þó þetta sé voða fínt þá verð ég að velta fyrir mér hvort þetta verði ekki fljúgandi hált í bleytu?“ skrifaði Ingi Örn Kristjánsson og benti á að fjöldi barna og fullorðinna hjólaði yfir brúna.
„Það langar engum að detta í grindverkið á þessari brú,“ bætti hann við.
Fleiri tóku undir áhyggjurnar. Sigurður Geirsson sagði málningu á yfirborði geta gert það sleipara í bleytu og benti á að um brúna færu bæði gangandi vegfarendur og hjólreiðamenn, þar á meðal á rafhjólum.
Einn íbúi sagðist vona að sérstaklega hefði verið hugað að vali á málningu:
„Frábært og fallegt! Vonandi var hugsað út í að velja málningu sem er ekki sleip í bleytu, það er það eina sem ég sé að þessu.“
Annar var afdráttarlausari og skrifaði: „Þetta verður flughált í bleytu.“
Guðrún Ólafsdóttir tók í sama streng og sagði að málning á göngufleti yrði mjög hál í bleytu. Hún vísaði jafnframt til annarrar framkvæmdar þar sem, að hennar sögn, hefði verið gætt að því að mála aðeins lóðrétta fleti en ekki þann hluta sem gengið væri á.
„Fallegt“ og „sumarlegt“ en aðrir segja framkvæmdina óþarfa
Sjálf framkvæmdin fékk þó einnig mikið lof. „Glæsilegt“, „Fallegt!“ og „Þetta er svo sumarlegt og fallegt“ voru meðal jákvæðra viðbragða við myndinni.
Aðrir voru mun síður hrifnir og lýstu brúnni meðal annars sem „hræðilegri“, „hallærislegri og þreytandi“ og sögðu framkvæmdina óþarfa. Enn aðrir gagnrýndu það sem þeir töldu pólitísk skilaboð eða of mikla sýnileika hinsegin tákna í bæjarlandinu.
Einn sagðist vilja sjá Mosfellsbæ verða þekktan sem „regnbogabæinn“ en tók fram að hann væri pínu sammála þeim sem kvarta yfir því að svona lagað geti verið hált í bleytu.
Nútíminn hafði samband við bæjarskrifstofu Mosfellsbæjar og spurðist fyrir um þá málningu sem notuð var við verkið og hvort sérstaklega hefði verið hugað að því hvort yfirborðið gæti orðið sleipt í bleytu.
Engin svör fengust að svo stöddu. Blaðamanni var bent á að senda skriflega fyrirspurn um málið en svar við henni hafði ekki borist þegar fréttin var skrifuð. Svörin verða birt ef þau berast.
