Ef Íslendingar segja já í þjóðaratkvæðagreiðslunni á laugardag þá er það mat stjórnvalda að aðildarviðræður gætu hafist fyrir árslok og hægt væri að ljúka þeim á einu og hálfu ári til tveimur. Ef niðurstaðan er nei hefjast aðildarviðræður ekki á ný.
Hvort sem niðurstaðan verður já eða nei heldur EES-samningurinn áfram að gilda um stöðu Íslands gagnvart Evrópusambandinu ásamt ýmsum öðrum samningum sem Ísland hefur gert. Fréttastofa óskaði eftir spurningum frá almenningi í tengslum við þjóðaratkvæðagreiðsluna.
Á meðal þess sem sumir vilja fá að vita er hversu langan tíma aðildarviðræður gætu tekið.
Hefjist viðræður á ný hafa íslensk stjórnvöld áætlað um það bil eitt og hálft til tvö ár í aðildarviðræður en nákvæm lengd viðræðna er óviss.
Kostnaðaráætlun stjórnvalda vegna aðildarviðræðna hljóðar upp á 1.895 milljónir króna. Áætlanir varðandi tíma og kostnað eru óhjákvæmilega háðar óvissu eins og segir í upplýsingabæklingi landskjörstjórnar fyrir þjóðaratkvæðagreiðsluna.
Ef farið verður í aðildarviðræður og aðildarsamningur gerður þarf að stíga ýmis skref, meðal annars að breyta stjórnarskránni. Ríkisstjórnin hefur boðað að haldin verði önnur þjóðaratkvæðagreiðsla um þann aðildarsamning sem fyrir lægi.
Stjórnarskrárbreytingar kalla á alþingiskosningar og því er ljóst að Ísland getur ekki orðið aðili að ESB á yfirstandandi kjörtímabili, sem lýkur að óbreyttu í byrjun desember 2028, nema boðað verði til kosninga fyrr. Taki ný ríkisstjórn við þá gæti það komið í hlut þeirrar ríkisstjórnar að ljúka aðildarferlinu.
