Alþingi afgreiddi í kvöld frumvarp ríkisstjórnarinnar um tímabundna lækkun á virðisaukaskatti á eldsneyti til að bregðast við verðhækkunum á olíu á heimsvísu. Breytingin gildir frá 1. maí til 31. ágúst.
Kristrún Frostadóttir segir að lækkunin sjáist fljótt á bensíndælunni. Eftirliti sé ætlað að tryggja að lækkunin skili sér til neytenda.
„Það munar um að við sjáum kannski ellefu prósenta lækkun á dælunni út af þessum aðgerðum. Þannig að þetta mun skila sér strax eftir 1. maí,“ segir Kristrún.
Mikilvægt sé að skammtímaaðgerðir sem þessar séu trúverðugar.
Útilokar ekki að framlengja lækkun
„Ég bind vonir við að það muni ekki þurfa að nota slíkt eftirlit, að þessu verði bara að fullu skilað til neytenda,“ segir Kristrún.
„Um er að ræða þrjá, fjóra mánuði. Það er mikið flökt á verði á þessum tíma og það getur verið erfitt fyrir neytendur að átta sig á hvernig álagningunni er háttað vegna þess að olíuverðið er að fara upp og niður mjög hratt milli daga.“
Hún útilokar ekki að aðgerðirnar verði framlengdar verði staðan óbreytt í lok ágúst.
Hildur Sverrisdóttir, þingmaður Sjálfstæðisflokksins, segist taka lækkuninni fagnandi en að hún ætti að gilda lengur.
„Það er skrítið að aðgerðin eigi eingöngu að vera út ágúst,“ segir Hildur. „Þingið er ekki að störfum í byrjun september og það er bara Alþingi sem getur gert breytingar á lögum. Ríkisstjórnin getur ekki gert það ein og sér og því lögðum við til að þetta væri allavega út október.“
Minnihlutinn barðist gegn verðlagseftirlitinu en breytingartillaga þeirra var felld.
