Um 90 prósent Marokkóbúa sem nú sækja um hæli í spænsku borginni Ceuta segjast vera samkynhneigðir og óttast ofsóknir í heimalandinu, að sögn fulltrúa spænska lögreglustéttarfélagsins SUP. Hann segir breytinguna hafa komið til eftir að það spurðist út að atvinnuleit og önnur efnahagsleg rök nægðu ekki til að fá hæli.
Þetta kemur fram í viðtali staðarmiðilsins El Pueblo de Ceuta við fulltrúa félagsins, Raúl Piera, sem birtist 16. október. Málið tengist innrásinni í Ceuta, spænskrar borgar á norðurströnd Afríku, dagana 30. og 31. júlí þegar allt að 80 þúsund manns réðust inn í borgina.
Félag spænskra lögreglumanna segir kynferðisbrot daglegt brauð í Ceuta – Vargöld ríkir í borginni
Atvinnuleit vék fyrir kynhneigð
Að sögn Piera voru ástæður umsækjenda fyrst af ýmsum toga, meðal annars atvinnuleysi og óskir um að hitta ættingja í Evrópu. Eftir um þrjár vikur hafi tveir af hverjum þremur vísað til ofsókna vegna kynhneigðar. Nú áætli hann hlutfallið 90 prósent.
„Í upphafi voru þeir ekki upplýstir og vissu ekki hvað þeir ættu að segja. En það spurðist út,“ segir hann við miðilinn.
Spænska dagblaðið ABC greindi einnig frá breytingunni í gær og hafði eftir lögregluheimildum að um 70 prósent nýlegra umsókna Marokkóbúa byggðust á ofsóknum vegna kynhneigðar.
Getur veitt rétt til hælis og dvalar
Ástæðan fyrir því að þessi rök geta þjónað umsækjendum er munurinn á efnahagslegum ástæðum fyrir brottflutningi og ofsóknum. Atvinnuleysi eða ósk um betri lífskjör veita ekki ein og sér rétt til hælis. Rökstuddur ótti við ofsóknir vegna kynhneigðar getur hins vegar gert það samkvæmt spænskum lögum um veitingu hælis.
Í Marokkó er samkynhneigð refsiverð. Samkvæmt 489. grein hegningarlaga landsins getur samkynhneigð varðað sex mánaða til þriggja ára fangelsi.
Umsækjandi sem fær viðurkennda vernd vegna slíkra ofsókna öðlast rétt til dvalar á Spáni og vernd gegn því að vera sendur aftur til Marokkó.
Gruna að umsækjendur lagi frásagnir að skilyrðunum
Heimildarmenn ABC innan lögreglunnar segja að grunur liggi á að umsækjendur lagi frásagnir sínar að upplýsingum sem gangi milli fólks um hvaða rök séu líklegust til að leiða til samþykkis. SUP segir breytinguna ekki eina og sér sanna víðtæk svik en kallar eftir ítarlegri athugun umsókna.
Fernando Grande-Marlaska, innanríkisráðherra Spánar, var spurður um málið í Ceuta í gær. Hann lagði áherslu á að það nægði ekki að halda fram tilteknum aðstæðum. Umsóknir væru metnar sérstaklega og rökstyðja þyrfti þörfina fyrir vernd.
Lögreglustéttarfélagið kallar jafnframt eftir fleiri sérfræðingum, hraðari afgreiðslu umsókna og því að lögmætum brottvísunum verði fylgt eftir.
