Bandarískir leyniþjónustumenn skutu og særðu vopnaðan mann skammt frá Hvíta húsinu í Washington fyrr í dag.
Atvikið var skömmu eftir að bílalest varaforsetans JD Vance ók hjá samkvæmt upplýsingum leyniþjónustunnar. Ekki er talið að maðurinn hafi ætlað að ráðast á Vance og leyniþjónustan vill ekki draga þær ályktanir að atvikið tengist fyrri árásum gegn ráðamönnum.
Leyniþjónustumenn komu auga á dularfullan mann á ferli sem virtist vopnaður og lagði á flótta þegar þeir nálguðust hann. Þá dró hann upp byssu og skaut að leyniþjónustumönnunum. Þeir skutu til baka og særðu manninn sem var fluttur á sjúkrahús.
