Senn líður að því að nýr meirihluti Sjálfstæðisflokks og Miðflokks taki við völdum í Reykjanesbæ en starf nefnda og ráða heldur áfram þangað til og fyrir helgi var reglubundinn fundur umhverfis- og skipulagsráðs þar sem fráfarandi meirihluti Beinnar leiðar, Samfylkingar og Framsóknarflokks ræður enn ríkjum. Á fundinum var meðal annars lögð fram vinnslutillaga að aðal- og deiliskipulagi fyrir Bergvík sem er í landi Suðurnesjabæjar en um 2-3 kílómetra frá íbúðabyggð í Reykjanesbæ. Óskað var umsagnar ráðsins um tillöguna en hluti af henni er að reisa sorpbrennslu í því skyni að framleiða orku. Var einhugur í ráðinu um umsögnina og þá meðal annars að mótmæla hugmyndum um að hæð reykháfs fyrir útblástur sorpbrennslunnar verði um tvöföld hæð turns Hallgrímskirkju. Bendir ráðið á að slík hæð muni ekki síst hafa sjónræn áhrif og gera reykháfinn að óæskilegu kennileiti.
Tillagan sem er eins og áður segir í vinnslu snýst um uppbyggingu hringrásariðngarðs í Bergvík og Helguvík sem er næst við fyrrnefndu víkina.
Segir í umsögn umhverfis- og skipulagsráðs Reykjanesbæjar að ráðið leggi áherslu á iðnað sem samræmist íbúðabyggð í Reykjanesbæ. Uppbygging iðnaðar skuli uppfylla skilyrði um bestu aðgengilegu tækni og lög um hollustuhætti og mengunarvarnir. Mikilvægt sé að íbúum í nágrenni iðnaðarsvæðis verði tryggð heilnæm lífsskilyrði og njóti heilnæms og ómengaðs umhverfis, í samræmi við markmið laganna.
Ráðið gerir einnig alvarlegar athugasemdir við þennan fyrirhugaða reykháf og segir að samkvæmt gögnum gæti hann trónað í 150 metra hæð yfir sjávarmáli og þar með myndað helsta kennileitið á Reykjanesi. Til samanburðar má nefna að turn Hallgrímskirkju er 74,5 metra hár.
Hæðin
Meðal þess sem lagt er til að verði í þessum iðnaðargarði er eins og áður segir sorpbrennslustöð sem framleiði orku með brennslunni. Samkvæmt uppdráttum í tillögunni er gert ráð fyrir að stöðin sjálf verði 30 metra há en að reykháfurinn, sem yrði þá ofan á stöðinni, verði 70-120 metra hár.
Samanlögð hæð gæti því orðið allt að 150 metrar og ljóst er að svo hár reykháfur myndi sjást víða að og yrði á meðal hæstu mannvirkja á landinu.
Í greinargerð með vinnslutillögunni segir meðal annars að losun frá brennslustöð myndi uppfylla kröfur ESB og bruni færi fram í margþrepa ferli sem tryggi að úrgangurinn sé nógu lengi við hátt hitastig þannig að komist verði hjá myndun skaðlegra gastegunda. Áætlað sé að stöðin framleiði um 10 megavött af raforku og 28 megavött af varma.
Segir enn fremur að miklar framfarir hafi átt sér stað í tæknibúnaði til brennslu og hreinsunar á afgasi. Nýlegar hátæknibrennslur sé ekki hægt að bera saman við litlar brennslur sem hafi verið starfræktar á Íslandi um hríð í byrjun aldarinnar, en lokað vegna mengunarvandamála. Nýlegar stöðvar séu oft staðsettar nálægt íbúðabyggð og engar rannsóknir hafi komið fram sem sýni fram á skaðleg áhrif af rekstri þeirra á heilsu fólks eða lífríki. Umhverfismál séu lykilatriði við undirbúning, hönnun, byggingu og rekstur brennslustöðva. Metnar hafi verið mögulegar staðsetningar fyrir hátæknibrennslustöð, þar á meðal á Helguvíkursvæðinu og hafi kosturinn komið vel út í samanburði þegar tekið sé tillit til stofn-, rekstrar- og flutningskostnaðar. Á Helguvíkursvæðinu hafi bæði verið nefndar staðsetningar í Helguvík og Bergvík.
Það virðist því vera opið hvar nákvæmlega á svæðinu stöðin ætti að vera.
Umhverfi
Segir enn fremir að í deiliskipulagstillögu sé valið að sýna mögulega staðsetningu lóðar fyrir brennslustöð í Bergvík og þannig opnað á umræðu um stöðina í kynningarferli skipulagsins. Tekið sé fram að engar ákvarðanir hafi verið teknar um uppbyggingu og/eða staðsetningu brennslustöðvar í Bergvík. Af hálfu Suðurnesjabæjar sé skýrt að brennslustöð séu ekki til umræðu nema að tryggt sé að stöðin muni ekki valda óþægindum vegna mengunar, hávaða, ólyktar eða skapa hættu fyrir heilbrigði manna og dýra.
Tekið er einnig fram að verði ákveðið að fara með lengra með hugmyndir um brennslustöðina muni hún sæta mati á umhverfisáhrifum.
Það er ekki að sjá við skjóta yfirferð yfir greinargerðina að minnst sé á sjónræn áhrif hins fyrirhugaða reykháfs stöðvarinnar en það skal þó ekki fullyrt.
