Ritstjórar á héraðsmiðlum segja reksturinn erfiðan. Þeir gagnrýna að hið opinbera versli sífellt fleiri auglýsingar á samfélagsmiðlum.
„Við troðum marvaða hvern dag. Þetta er bara hark,“ segir Gunnar Gunnarsson, ritstjóri Austurfréttar og Austurgluggans.
Páll Ketilsson, ritstjóri Víkurfrétta, segir að reksturinn verði sífellt erfiðari. Hann verður þess var að bæði fyrirtæki og hið opinbera beini auglýsingakaupum sínum í ríkari mæli til samfélagsmiðla. „Sérstaklega Facebook og Instagram og við finnum fyrir því.“
Logi Einarsson menningarráðherra sagði í Kastljósi í gær að mikilvægt væri að styðja við héraðsmiðlana. Staða fjölmiðla almennt væri erfið. Stór hluti nýrra auglýsingatekna rennur til erlendra fyrirtækja.
„Verðum ekki til staðar endalaust ef þetta á að gerast svona“
Gunnar segir að stóru sveitarfélögin á Austurlandi séu drjúg í auglýsingakaupum af Austurfrétt.
„Enda höfum við unnið markvisst í því að tryggja vitund þeirra.“
Stofnanir ríkisins mættu þó að hans mati vera duglegri.
Hann tekur dæmi um það að opinberar stofnanir óski stundum eftir umfjöllun um auglýsinga- eða vitundarherferðir.
„Sem er búið að eyða einhverjum milljónum í að kosta birtingar á YouTube og gerð. Við eigum að koma að verkefninu af einhverri góðmennsku. Við getum alveg verið næs en við verðum ekki til staðar endalaust ef þetta á að gerast svona.“
„Þetta er þungt og mikið púlsl,“ segir Skapti Hallgrímsson, ritstjóri Akureyrar.net, um reksturinn. Hann segir að það sé mjög sjaldgæft að hið opinbera kaupi auglýsingar hjá miðlinum.
Skapti segir blóðugt að sjá á sama tíma að ríkið auglýsi á Facebook. „Það eru peningar sem myndu koma okkur vel.“
Páll bendir á að samfélagsmiðlar veiti ekki fréttaþjónustu og sinni skyldum líkt og héraðsmiðill gerir.
„Þess vegna er fúlt að horfa upp á það – sérstaklega með opinbera aðila – að þeir séu í meiri mæli að nota samfélagsmiðla sem hafa engar skyldur á svæðinu til þess að vera með neina fréttaþjónustu. [...] Þetta er vissulega slæm þróun og verri fyrir okkur.“
