Stjórnvöld fimm Evrópuríkja vinna í sameiningu að gerð samnings við eitt ríki utan álfunnar um að fá að koma upp brottvísunarstöð. Þangað myndu ríkin senda fólk sem neitað hefur verið um dvöl. Ekki hefur verið gefið upp hvaða land það er sem ríkin fimm eru að semja við.
Ráðherrar frá Grikklandi, Austurríki, Þýskalandi, Hollandi og Danmörku samþykktu á fundi í Kaupmannahöfn í dag að semja við ákveðið ríki utan Evrópu um að fá að setja þar upp brottvísunarbúðir. Ráðherra innflytjendamála í Danmörku, Morten Bodskov, sagði við fjölmiðla að hann búist við að samningur verði í höfn um áramót.
Dönsk stjórnvöld stefna að því að senda fólk í brottvísunarbúðir 2027
Stjórnvöld í Danmörku stefna að því að senda umsækjendur um alþjóðlega vernd í brottvísunarbúðir utan Evrópu strax á næsta ári. Bodskov segir í yfirlýsingu að það sé markmið stjórnvalda að senda fyrstu einstaklingana, sem hafi fengið neitun, í slíkar búðir í lok næsta árs.
Bodskov segir þetta mikilvægt skref í þá átt að gera hælisleitendakerfi landsins skilvirkara. Hann segir stjórnvöld ekki samþykkja að erlendir ríkisborgarar dvelji ólöglega í Danmörku lengur en ella vegna vandkvæða við að brottvísa þeim.
Umdeild áform að senda fólk til þriðja ríkis
Evrópuþingið samþykkti í júní hertar reglur um innflytjendur. Með hertu reglunum fengu aðildarríki auknar heimildir til að brottvísa fólki og stofna brottvísunarbúðir utanlands. Fyrirætlanir um slíkar búðir hafa verið harðlega gagnrýndar af mannréttindasamtökum. DR, danska ríkisútvarpið, hefur eftir Peder Hvelplund, talsmanni útlendingamála hjá Einingu (d. Enhedslisten), að hann telji þetta varhugaverðar fyrirætlanir hjá stjórnvöldum. Hætta sé á að hælisleitendur endi í einræðisríkjum. Erfitt verði að tryggja að mannréttindi fólksins verði ekki brotin.
Stjórnvöld í Bretlandi ætluðu fyrir nokkrum árum að byrja að senda fólk sem sótti um hæli í brottvísunarbúðir í Rúanda. Hæstiréttur landsins komst að þeirri niðurstöðu að slíkt væri ekki samkvæmt mannréttindalögum.
