Það er ótækt að skipuleggjendur viðburða líti á matarvagna sem viðskiptavini en ekki hluta af þjónustu, segir Hjalti Vignisson veitingamaður. Hjalti er óviss um hvort hann taki þátt í tónleikum Kaleo á Þingvöllum 20. júní, Bergmáli, sökum þess sem hann kallar skilningsleysi og græðgi skipuleggjenda.
„Það er búið að vera draga okkur svolítið á asnaeyrunum, svo vikum skiptir, með einhver gjöld og prósentur sem við eigum að greiða til tónleikahaldara, eða einhvers aðila sem sér um tónleikana, sem er bara ekki í neinum takti við það sem þekkist á Íslandi,“ segir Hjalti í viðtali við fréttastofu. Hann rekur veitingastaðinn 2Guys og matarvagn undir sömu merkjum.
Jakob Frímann Magnússon, einn skipuleggjenda Bergmáls, segir fréttastofu að það verði nóg af veitingamönnum á Þingvöllum og enginn sé skortur á matarvögnum. Samkvæmt heimildum fréttastofu hafa skipuleggjendur Bergmáls breytt kröfum sínum. Hjalti segir þá hafa gengist við upphaflegum óskum veitingamanna og hann íhugar þátttöku sína.
Óraunhæf gjöld sem komi niður á veitingamönnum
Þessi frétt byggir á viðtali við Hjalta Vignisson. Fréttastofa hefur náð tali af fleiri veitingamönnum sem voru í viðræðum um að taka þátt í Bergmáli og lýsa sambærilegri upplifun. Þeir vilja ekki að nafns síns sé getið.
Algengt er að gjöld séu lögð á matarvagna fyrir þátttöku í viðburðum eins og bæjar- og útihátíðum og tónleikum. Hjalti segir það alla jafna ganga vel að ná samningum við skipuleggjendur. Flestir sýni veitingamönnum skilning.
„Þetta hefur alltaf verið nokkuð fair og sanngjarnt á báða bóga, af því að við erum líka þjónustuaðili. Við erum ekki viðskiptavinurinn og eigum ekki að vera hann. Allir viðburðir sem matarvagn mætir á, hvort sem það er bæjarhátíð, útihátíð, sjómannadagurinn, 17. júní, þetta er gert til að bæta upplifun gesta. Við erum eingöngu þarna til að bæta upplifun,“ segir Hjalti.
Í tilfelli Bergmáls hafi verið krafist óeðlilega mikils af veitingamönnum. Óljóst hafi verið hve mikið þeir áttu að greiða fyrir aðstöðu og aðeins skammur tími til stefnu.
Veitingamenn hafa lýst mikilli óánægju með þá gjaldtöku sem Bergmál ætlaði sér, sem hefði bæði falist í gjöldum og hlutfalli af tekjum yfir tónleikana. Bergmál hefur síðan dregið í land.
„Það kostar að hafa matvagna, það kostar rafmagn og það kostar salerni fyrir starfsmenn og annað. Það er allt í lagi að hafa aðstöðugjald eins og þekkist á öllum hátíðum. En þegar gjaldið er of hátt, þannig að ég þarf að hækka matarverð hjá mér og mögulega bíða þess hnekki að þurfa að selja hamborgarann á þrjú og fimm í staðinn fyrir tvö og fimm, þá ætla ég ekki að leggja fyrirtækið mitt að veði þegar fólk kemur á tónleikana.“
Framkvæmdastjóri SVEIT um stöðu matarvagna
Fréttastofa sendi fyrirspurn á Einar Bárðarson, framkvæmdastjóra Samtaka fyrirtækja á veitingamarkaði, og óskaði eftir viðbrögðum við stöðunni. Svar Einars er birt hér í heild:
„Matarvagnarnir hafa verið að koma meira inn á þennan markað og lífga bæði um borg og bæi í kringum bæjarhátíðir, stórtónleika og aðra viðburði um allt land. Nokkrir af okkar félagsmönnum eru að reka matarvagna í tengslum við sína veitingastaði. Kaup og kjör eru mjög misjöfn eftir aðstæðum eðlilega en í flestum þessum árlegu verkefnum eru þessir þættir í föstum skorðum þótt einhverjir þættir breytist lítillega á milli ára,“ segir Einar.
„Þegar um einstaka risaviðburði er að ræða sem ekki hafa fordæmi eða framkvæmdir við sambærilegar aðstæður áður er eðlilegt að allir aðilar séu að leita að punktinum þar sem hægt er að mætast. Bæði viðburðarhaldarar eru að leggja mikið undir og rekstur vagna langt frá þéttbýli útheimtir líka mikinn kostnað í allri framkvæmd. Markaðurinn verður hins vegar að leysa það sjálfur og oftast gerir hann það,“ segir Einar.
