„Það er mér sannur heiður að lýsa þessari sýningu á Bayeux-reflinum opna,“ sagði Nicholas Cullinan, safnstjóri breska þjóðminjasafnsins, áður en hann klippti á rauða borðann við sýningarsalinn sem hýsir Bayeux-refilinn.
Refillinn, sem er nærri 70 metra langur, sýnir aðdraganda og atburðarás orrustunnar við Hastings 1066. Hann var fluttur frá Frakklandi í skjóli nætur í sumar og kemur nú fyrst fyrir almenningssjónir í Bretlandi allt frá því hann var saumaður fyrir nærri þúsöld síðan.
Á reflinum endilöngum má finna alls 58 senur. Þeirra þekktustu er ef til vill sú næstsíðasta. Á henni má sjá Harald Guðnason Englandskonung fá ör í augað. „Hér er Haraldur konungur drepinn,“ segir í saumuðum texta fyrir ofan senuna. Fræðimenn greinir á um hvort örin hafi verið í upprunalegri gerð refilsins eða hvort henni hafi verið bætt við á 19. öld.
BBC hefur tekið saman skemmtilega tölfræði um refilinn. Þar segir að á honum megi finna 620 karla og sex konur, þar af eru þrjár í aðalmyndefni refilsins en þrjár má finna í bekkjum refilsins sem eru fyrir ofan og neðan senurnar. 737 dýr má finna í reflinum og 93 eða 94 getnaðarlimi – fræðimenn eru ekki á eitt sammála um fjölda þeirra.
Viðtökurnar hafa ekki látið á sér standa. Nú þegar eru miðar á sýninguna uppseldir út þetta ár en hún stendur fram í júlí. Gestir sem BBC hefur rætt við í dag voru margir snortnir af því að sjá refilinn með berum augum.
„Ég er ekki mjög tilfinningasamur eða tjáningarríkur maður en ég varð agndofa af honum,“ segir Adrian Harris sem var á meðal fyrstu gesta safnsins til að sjá refilinn.
Cecilia og Fabio Zanini voru sömuleiðis mjög hrifin af útsaumsverkinu og ekki síst stærð refilsins. „Geislandi litadýrðin kom mér á óvart og smáatriðin í fólkinu,“ segir Cecilia við BBC. „Við fengum bæði gæsahúð.“
Sumir gestir kvörtuðu þó undan því hversu margir hafi verið um hituna. Því hafi reynst erfitt að dást að smáatriðum í reflinum. „Þetta er ein löng röð,“ segir Hadyn Blakeston við BBC sem líkti upplifuninni af því að skoða refilinn við það að vera á færibandi.
