Veðrið sem gengið hefur yfir landið síðasta sólarhringinn er nú smám saman að ganga niður en gular viðvaranir verða þó í gildi fram undir hádegi.
Birgir Örn Höskuldsson veðurfræðingur hjá Veðurstofu Íslands segir í samtali við fréttastofu að spár hafi gengið eftir. Hvasst hafi verið í gær og úrhellisrigning fyrir austan. Þá hafi hríð skollið á á norðanverðu landinu. Nú sé lægðin að fjarlægjast landið og með því dragi úr vindi.
„Í rauninni styttir upp þegar líður á daginn og eftir hádegi verður komið ágætis veður um mest allt land nema helst að það mun blása nokkuð á Austurlandi og mögulega Suð-Austurlandi.“
Dregið úr aðgerðum úr miðnætti
Hermann Karlsson, aðalvarðstjóri hjá Lögreglunni á Norðurlandi eystra, stýrði aðgerðum í gær. Hann var kominn aftur á vaktina snemma í morgun og sagði að nóttin hefði gengið vel fyrir sig.
Aðgerðastjórn dró saman seglin upp úr hádegi. Þá var komin ró á hlutina. Hermann segir að engar upplýsingar hafi borist um tjón.
Birgir segir veðrið ekki eiga að hafa mikil áhrif á höfuðborgarsvæðinu en á Norður- og Austurlandi sé snjór á vegum og þar þurfi vegfarendur sem eru snemma á ferðinni að hafa færðina sérstaklega í huga áður en vegir eru ruddir. Hann bendir einnig á að á Suðausturlandi og Austfjörðum séu ekki viðvaranir en þar megi þó búast við snörpum vindstrengjum fram undir kvöld.
