Útivistarfélögin Ferðafélag Íslands og Útivist og Björgunarsveitin Dagrenning á Hvolsvelli vara fólk við hættulegum aðstæðum á gönguleiðinni yfir Fimmvörðuháls.
Gil og sprungur hafa opnast á leiðinni síðustu ár samhliða því að jökullinn hefur hopað. Einnig hafa myndast brattar brekkur og skriður á hluta leiðarinnar milli Baldvinsskála og Fimmvörðuhálsskála þar sem áður var snjór eða jökulís.
Einnig hafa komið í ljós snjóbrýr þar sem snjó vetrarins hefur tekið upp. Undir þeim renna jökulár. Í tilkynningu félaganna segir að mjög hættulegt geti verið að fara yfir jökulbrýrnar eða nálgast þær.
Félögin vara fólk við því að leggja af stað á göngu yfir Fimmvörðuháls nema það sé vel búið til ferðarinnar, með viðeigandi útbúnað og föt og hafi kynnt sér aðstæður vel. Þau segja að ekki sé ráðlegt að vera einn á ferð, best sé að ferðast í gönguhópi og helst með reyndum leiðsögumanni sem þekki aðstæður á Fimmvörðuhálsi.
Í tilkynningu Útivistar, Ferðafélags Íslands og Björgunarsveitarinnar Dagrenningar segir að það sé sameiginlegt verkefni þeirra sem reki og haldi leiðinni við að finna nýja og öruggari gönguleið á þeim hluta þar sem hættulegar aðstæður hafa skapast.
