Var hent undir lestina af Þjóðhátíðarnefnd

Segir hlaðvarpsumfjöllun hafa kveikt storminn

Að sögn Ingós má rekja upphaf málsins til umfjöllunar í hlaðvarpi hennar þar sem ásakanir komu fram. Í kjölfarið hafi hópur sem samanstóð af um 40 konum sett saman undirskriftarlista til Þjóðhátíðarnefndar með kröfu um að hann fengi ekki að koma fram.

Hann segir að andrúmsloftið í samfélaginu á þeim tíma hafi ýtt undir að látið var undan slíkum kröfum án þess að þær væru í raun skoðaðar frekar.

Gagnrýnir Eddu Falak harðlega

Í viðtalinu er bent á að Edda hafi síðar verið staðin að lygum í tengslum við bæði einstaklinga og málefni. Frosti segir ljóst að hún hafi ekki verið sá réttlætisriddari sem hún hafi gefið sig út fyrir að vera á þeim tíma.

Þá veltir hann því upp hvernig þær konur sem skrifuðu undir áskorunina sjái málið í dag.

Undirstrikar áhrif ákvörðunar Þjóðhátíðar

Ingó segir að ákvörðun Þjóðhátíðarnefndar hafi haft afgerandi áhrif á hvernig almenningur túlkaði málið.

„Þegar mér var aflýst þá styrkti það þá hugmynd að ég væri sekur,“ segir hann og bætir við að það hafi haft keðjuverkandi áhrif á bæði orðspor hans og atvinnu.

Segir nefndina hafa óttast viðbrögð og þrýsting

Hann segir að fólk innan Þjóðhátíðarnefndar hafi í samtölum við hann viðurkennt að það vildi ekki taka áhættu né rugga bátnum. Þá nefnir hann einnig að utanaðkomandi þrýstingur, meðal annars frá fyrirtækjum, hafi haft áhrif á ákvörðunina. Að hans mati hafi þetta ekki aðeins verið ákvörðun um dagskrá Þjóðhátíðar heldur ákvörðun sem hafi haft bein áhrif á lífsviðurværi hans.

Þrátt fyrir að hann segist hafa fengið stuðning í einkasamtölum frá fólki í Vestmannaeyjum, hafi fáir verið tilbúnir að koma honum til varnar opinberlega. Hann segir þetta sem dæmi um hvernig fólk sé oft tilbúið að fylgja straumnum þegar umræðan verður hörð, frekar en að taka afstöðu sem gæti verið óvinsæl.

Sár reynsla en heldur tengslum við Eyjar

Ingó segir reynsluna hafa verið sára, sérstaklega í ljósi tengsla sinna við Vestmannaeyjar þar sem hann hafi komið fram árum saman, samið lag fyrir hátíðina og lagt sitt af mörkum til að gera hana sem besta.

Hann segist þó enn bera hlýjan hug til fólksins í Eyjum þrátt fyrir að sambandið við sjálfa Þjóðhátíð hafi breyst.

Hægt er að sjá brot úr viðtalinu hér fyrir neðan en ef þú vilt sjá allan þáttinn geturðu tryggt þér áskrift að Brotkast.is hérna.