Ólíklegt er að tilræði gegn Bandaríkjaforseta í gær hafi áhrif til lengri tíma á stöðu hans, fylgi eða vinsældir segir dósent í stjórnmálafræði. Hún telur að mestu áhrifin verði á samsæriskenningasmiði.
Embættismenn ríkisstjórn Bandaríkjaforseta skotmörk
Hleypt var af skotum á kvöldverði samtaka blaðamanna á Hilton-hótelinu í Washington, höfuðborg Bandaríkjanna, í gær þar sem Donald Trump Bandaríkjaforseti var meðal gesta.
Árásarmaðurinn var handtekinn af lífvarðarsveit forsetans eftir atvikið og er í varðhaldi. Sá hefur verið nafngreindur í fjölmiðlum vestanhafs. Hann heitir Cole Tomas Allen og er 31 árs frá Torrance í Kaliforníu.
Dómsmálaráðherra Bandaríkjanna, Todd Blanche, segir að bráðabirgðaniðurstöður rannsóknar á atvikinu bendi til þess að embættismenn í ríkisstjórn Trump hafi verið skotmark Allen – og líklegt að Trump Bandaríkjaforseti hafi verið þeirra á meðal.
Þriðja tilræðið gegn Trump
„Þetta er í þriðja skipti sem það hefur verið gert tilræði gegn Trump, bæði þegar hann var í kosningabaráttunni og svo eftir að hann varð forseti. Hin tvö höfðu kannski ekki mikil áhrif, það var aðeins í fyrsta tilræðinu sem vinsældir hans jukust í kosningabaráttunni í örfáa daga svo mælanlegt væri,“ segir Svanhildur Þorvaldsdóttir, dósent í stjórnmálafræði við Háskóla Íslands.
Svanhildur segir erfitt að segja til um hvort vinsældirnar hafi aukist vegna tilræðisins eða einhvers annars sem var í gangi á þeim tíma.
„Þannig að þetta verður í fréttum núna í einhverja daga og mögulegt að þetta hafi áhrif á hans stuðningsmenn, að þeir fari að styrkjast enn frekar í stuðningi sínum við hann. En það er erfiðara að sjá að þetta sé að fara að hafa einhver stórvægileg langtímaáhrif á Bandaríkin eða almennar vinsældir Bandaríkjaforseta,“ segir Svanhildur.
Mestu áhrifin verði á samsæriskenningasmiði
Svanhildur telur þó líklegt að tilræðið kyndi undir samsæriskenningum.
„Stuðningsmenn Trumps munu væntanlega sjá þetta sem enn eitt tilræðið gegn honum, tilraun til að koma honum frá sem er að reyna að umbreyta Bandaríkjunum á góðan hátt og verða þá einarðari í afstöðu sinni gagnvart honum,“ segir Svanhildur.
„Og sama á vinstri vængnum, og ég held að maður sé nú þegar farinn að sjá yfirlýsingar um hvort að þetta var nú kannski bara hann sjálfur sem skipulagði þetta til að reyna að styðja við vinsældir sínar eða eitthvað slíkt. Og yfirlýsingar eins og þetta með Hvíta húsið draga kannski ekki beint úr svoleiðis hugmyndum, ýta frekar undir þær. Þannig ég held að þetta sé eitthvað sem við eigum eftir að sjá töluvert af í framtíðinni.“
