Dularfull breyting hefur orðið á Facebook síðu Al Jazeera English eftir að athygli var vakin á því að þúsundir notenda hefðu brugðist með hláturs“tjákni“ við frétt miðilsins um hryðjuverkaárásina á pride gönguna í Berlín.
Enn sést hversu margir brugðust við færslunum, en nú er ekki lengur hægt að sjá nöfn þeirra sem stóðu á bak við viðbrögðin nema þeir séu vinir þess sem skoðar. Breytingin virðist ná til fleiri færslna Al Jazeera English og þessi breyting varð sýnileg skömmu eftir að farið var að beina sjónum sérstaklega að því hverjir hefðu brugðist með hlátursköllum við fréttinni um árásina.
Yfir 3.600 brugðust við með hlátri
Þýski miðillinn Apollo News fjallaði í dag um viðbrögðin við Facebook færslu Al Jazeera English um árásina.
Þar kom fram að meira en 3.600 manns hefðu brugðist við fréttinni með hláturmerki. Þá voru tæplega 1.800 athugasemdir undir færslunni og í fjölda þeirra var árásinni fagnað eða gert grín að fórnarlömbunum.
Meðal athugasemda sem Apollo News birti voru skilaboð á borð við „Er bíllinn í lagi?“ og „Bíllinn hatar þau líka“. Annar notandi skálaði fyrir þeim sem framdi árásina.
Athugasemdirnar voru enn sýnilegar þegar Apollo News fjallaði um málið og samkvæmt miðlinum höfðu þær hvorki verið fjarlægðar né lokað fyrir þær.
Hvatti fólk til að skoða hverjir hlógu
Ástralski aðgerðasinninn Drew Pavlou vakti einnig mikla athygli á málinu á X á sunnudag og hvatti fólk sérstaklega til að fara inn á Facebook síðu Al Jazeera og skoða viðbrögðin við fréttinni.
„Ef þú ferð á Facebook síðu Al Jazeera sérðu þúsundir hláturviðbragða við færslunni þeirra um hryðjuverkaárásina á Pride gönguna í Berlín,“ skrifaði Pavlou.
If you go to the Al Jazeera Facebook page you will see thousands of laugh reacts on their post about the Berlin pride parade terrorist attack. Hundreds of comments from Muslims celebrating pic.twitter.com/sa4nbQBBjR
— Drew Pavlou 🇦🇺🇺🇸🇺🇦🇹🇼 (@DrewPavlou) July 26, 2026
Hann fullyrti jafnframt að hundruð múslima væru að fagna árásinni í athugasemdakerfinu.
Á þessum tíma var hægt að smella á hláturviðbrögðin og sjá nöfn þeirra notenda sem höfðu brugðist þannig við færslunni.
Nú er það ekki lengur hægt.
Aðeins vinir sjást
Þegar smellt er á viðbrögð við færslum Al Jazeera English birtir Facebook nú tilkynningu þess efnis að aðeins nöfn vina sem hafi brugðist við verði sýnd.
Ekki liggur fyrir hvort Meta hafi gert breytinguna sjálft eða hvort hún tengist stillingum eða aðgerðum Al Jazeera English.
Tímasetningin vekur þó athygli sem og að nöfn þeirra sem hlógu að fréttinni voru sýnileg þegar þúsundir hláturviðbragða fóru að vekja athygli á samfélagsmiðlum og í fjölmiðlum. Skömmu síðar var ekki lengur hægt að sjá hverjir stóðu á bak við þau.
