Þrír táningar á aldrinum 16-17 ára hafa verið ákærðir fyrir að skipuleggja sprengjuárás á ótilgreindum stað í Ósló í Noregi í fyrrahaust. Saksóknari í Vestur-Noregi gefur út ákæruna. Piltarnir eru allir frá Rogalandi.
Fjallað er um ákæruna í frétt norska ríkisútvarpsins, NRK. Þar segir að piltunum sé gefið að sök að hafa lagt á ráðin um að varpa handsprengjum eða koma af stað sprengingu í borginni með öðrum hætti. Samkvæmt heimildum NRK tengjast fyrirætlanir þeirra sprengingu í borginni í september í fyrra.
Tveir piltanna eru sagðir hafa komist að samkomulagi við þriðja piltinn um að taka við sprengiefni og koma því fyrir í miðborg Óslóar.
Lögmaður eins þeirra segir umbjóðanda sinn hafa játað brot sín í yfirheyrslum.
Tveir piltanna eru einnig ákærðir fyrir að reyna að ráða fleiri drengi undir lögaldri til að koma sprengingunum til leiðar. Þeir eru grunaðir um að starfa fyrir glæpagengið Foxtrot. Það er umfangsmesta glæpagengi Norðurlanda og því stýrir Rawa Majid sem gengið hefur undir heitinu Kúrdíski refurinn.
