Þrír menn í annarlegu ástandi voru handteknir fyrir rán í Grafarvogi í gærkvöldi eða í nótt. Þeir voru allir vistaðir í fangageymslu. Þetta kemur fram í dagbók lögreglunnar á höfuðborgarsvæðinu vegna verkefna frá klukkan 17 í gær til klukkan 5 í morgun.
Ekki kemur fram í dagbókinni hvað var tekið eða hvort einhver hafi slasast.
Alls voru 56 mál skráð í kerfi lögreglunnar á tímabilinu og þegar dagbókin var rituð gistu sex í fangageymslu. Lögreglan tekur fram að listinn sé ekki tæmandi.
Gat ekki sagt til nafns
Annar maður í annarlegu ástandi var handtekinn í Grafarvogi. Hann var vistaður í fangageymslu þar sem hann gat ekki sagt til nafns né hvar hann ætti heima.
Á 132 í Garðabæ
Tveir ökumenn voru stöðvaðir fyrir of hraðan akstur í Garðabæ. Annar mældist á 132 kílómetra hraða og hinn á 126 þar sem hámarkshraði er 80. Báðir fengu sekt.
Í Kópavogi var ökumaður stöðvaður á 118 kílómetra hraða þar sem hámarkshraði er 80. Við athugun kom í ljós að hann var réttindalaus. Málið var afgreitt með sekt. Annar ökumaður var stöðvaður í Kópavogi vegna gruns um akstur undir áhrifum fíkniefna og reyndist hann einnig sviptur ökuréttindum. Hann var laus að lokinni blóðsýnatöku.
Ekið á ljósastaur
Í miðborginni var bíl ekið á ljósastaur. Meiðsli voru minniháttar og málið var afgreitt á vettvangi.
Í Hafnarfirði voru tveir ökumenn stöðvaðir vegna gruns um ölvunarakstur og einn vegna gruns um akstur undir áhrifum fíkniefna. Þeir voru lausir að lokinni blóðsýnatöku. Þá var einn sektaður fyrir að tala í farsíma undir stýri án handfrjáls búnaðar. Einnig var tilkynnt um þjófnað úr verslun í hverfi 108 og var málið afgreitt á vettvangi.
