Byggingarnar sem Finnska menningarsögufélagið hefur tilnefnt eru allar í Finnlandi, þar sem Aalto starfaði með eiginkonum sínum, sem einnig voru arkitektar - Aino sem lést 1949 og síðan Elissu.
Ein af þeim þekktustu er Finlandia-tónleika- og ráðstefnuhöllin sem tekin var í notkun seint á sjöunda áratug síðustu aldar. Meðal annarra bygginga er Paimio-heilsuhælið í samnefndum bæ í Finnlandi; bygging sem fyrir löngu er orðin fræg sem eitt af bestu dæmunum um byggingarlist Aaltos.
Finnska menningarsögufélagið segir í umsókn sinni að byggingarnar þrettán séu ekki endilega þær bestu sem Aalto hannaði, heldur standi þær fyrir þau áhrif sem arkitektarnir höfðu á þróun finnsks samfélags á síðustu öld.
Aalto hannaði hús víða um heim og eitt hér á landi; það erNorræna húsið í Vatnsmýrinni í Reykjavík, sem opnað var 1968. Á heimasíðu Norræna hússins segir meðal annars um Aalto:
„Útgangspunktur allrar vinnu hans var að setja eðli og þarfir mannsins í fyrirrúm, og hann var sannfærður um gildi góðrar byggingarlistar til að auðga mannlegt líf og tilveru.“
