„Í stað þess að fara Framsóknarleiðina með áherslu á vinnu, vöxt og velferð blasir við önnur niðurstaða. Ríkisstjórnin hefur því miður valið að fara aðra leið, leið skatta, samdráttar og skerðingar.“
Þetta voru lokaorð Stefáns Vagns Stefánssonar, formanns þingflokks Framsóknarflokksins, í ræðu sinni eftir stefnuræðu forsætisráðherra á Alþingi í kvöld. Hann segir ríkisstjórnina fá falleinkunn í hagstjórn.
Stefán Vagn nýtti ræðuna meðal annars til að líta yfir farinn veg ríkisstjórnarinnar, „hinnar svokölluðu verkstjórnar“. Hann sagði loforð ríkisstjórnarinnar um að berja niður vexti og verðbólgu hafa elst illa. Þess í stað sé verðbólga á uppleið og vextir í hæstu hæðum.
„Ríkisstjórnin virðist vera þess vanmáttug að valda því verkefni sem hún var kosin út á, verkefni sem hún lagði höfuðáherslu á fyrir kosningar, verkefni sem þjóðin treysti henni fyrir. Verkefni sem hún gleymdi og fór í annað,“ sagði Stefán Vagn.
„Hver man ekki eftir verðmætasköpunarhaustinu?“
Þá ræddi hann gjaldskrár- og skattahækkanir sem boðaðar eru í nýju fjárlagafrumvarpi ríkisstjórnarinnar.
„Alls eru milli 20 og 30 milljarða króna skattahækkanir boðaðar í fjárlögum næsta árs. Hvert heldur hæstvirt ríkisstjórn að þessar hækkanir muni fara annað en út í verðlag og enda á borðum heimila og fyrirtækja í landinu?“
Hann gagnrýndi áherslu ríkisstjórnarinnar á hallalaus fjárlög, sama hvað það kosti, eins og Kristrún Frostadóttir forsætisráðherra orðaði það í vor. Þau kosti of mikið. Hann sagði aðferðafræðina ranga og ríkisstjórnina á rangri leið.
„Hver man ekki eftir verðmætasköpunarhaustinu? Ekkert. Ekkert gerðist og nú er aftur komið haust og farið að kólna. Ekki bara í veðri heldur einnig í efnahag þjóðarinnar. Atvinnuleysi er á uppleið, hagvöxtur á niðurleið og forsenduákvæði kjarasamninga brostið.“
Stefán segir tíma kominn á þjóðarsátt og að Framsóknarflokkurinn sé reiðubúinn til samstarfs í vetur.
„Við höfum lagt fram tillögur í efnahagsmálum og munum halda því áfram. Sá tími sem fór í deilur um aðildarviðræður við Evrópusambandið er liðinn. Nú taka við verkefni vetrarins: heilbrigðisþjónusta sem þarf að styrkja, fjölskyldur sem þurfa svigrúm, fyrirtæki sem þurfa að geta fjárfest og sótt fram og menntun sem þarf að taka föstum tökum.“
