Sveitarstjórnarfólk á Norðurlandi eystra segir landsbyggðarskatt felast í nýkynntum fjárlögum, til dæmis með kílómetragjaldinu og hækkun virðisaukaskatts á baðlón. Samtök sveitarfélaga á Norðurlandi eystra samþykktu ályktun gegn aukinni gjaldtöku á baðlón á haustþingi í dag. Þingið fór fram á Dalvík og voru mættir fulltrúar frá þeim tíu sveitarfélögum sem standa að SSNE.
Til stóð að álykta gegn hækkun á kílómetragjaldi en það var ekki gert. Ástæðan var sögð sú að of skammur tími hefði gefist til að skrifa ályktun, en fjárlagafrumvarpið var kynnt fyrir tveimur dögum.
„Þetta leggst ekki allt of vel í okkur. Ég les því miður út úr þessu svolítið mikið af landsbyggðarskatti. Fyrst ber að nefna kílómetraskattinn. Mér líst illa á þessa þróun þar. Þó þetta sé lítið í krónutölum fyrir hvern kílómetra þá gæti þetta orðið gríðarlega há upphæð. Baðlónin, það er eitt baðlón á höfuðborgarsvæðinu, öll hin eru á landsbyggðinni. Ég vil kalla þetta landsbyggðarskatt,“ segir Heimir Örn Árnason, formaður stjórnar SSNE.
Ráðherra ekki sammála
Logi Már Einarsson er fyrsti þingmaður Norðausturkjördæmis og ráðherra í ríkisstjórn. Logi var lengi bæjarfulltrúi á Akureyri og var sjálfur formaður SSNE áður fyrr. Hann var ekki sammála formanni stjórnar samtakanna um landsbyggðarskatt.
„Þvert á móti. Hinn raunverulegi landsbyggðarskattur sem við landsbyggðarfólkið höfum verið að greiða núna síðustu árin er vegna þess að innviðirnir okkar hafa verið látnir grotna niður. Varðandi baðlónin þá eru þau nú svona lúxusferðamannastaður sem við íbúarnir notum líka. Þau eru út um allt land. Hér er um það að ræða að við erum að afnema ívilnun sem hefur verið á þessum baðlónum. Varðandi kílómetragjaldið þá getur þetta auðvitað hitt fólk allavegana. Þetta er auðvitað ekki nema ein króna per kílómetra sem þetta er að hækka,“ segir Logi Már.
