Bjarni Benediktsson framkvæmdastjóri Samtaka atvinnulífsins segir að horfa þurfi á forsendur kjarasamninga í stærra samhengi. Málið snúist um meira en að bjarga kjarasamningum fyrir 8. október.
Forsendur kjarasamninga brustu þegar verðbólga mældist yfir viðmiði kjarasamninga í ágúst. Aðilar vinnumarkaðarins hafa þann kost á að rifta samningum fyrir áttunda október, finnist ekki lausn.
„Ég horfi þannig á þessa stöðu að þetta snýst ekkert bara um það að bjarga kjarasamningum á þessum tímapunkti fyrir 8. október. Að sjálfsögðu hljótum við að horfa á hlutina í einhverju stærra samhengi og spyrja okkur: Hvernig gengur okkur í dag og hvernig mun okkur ganga á næstunni við að framleiða frekari verðmæti í landinu til þess að standa undir lífskjörunum?“
Samráð hafi skilað sér í ákveðnum atriðum
Finnbjörn A. Hermannsson, forseti ASÍ, sagði við fréttastofu í dag að engar eiginlegar viðræður væru hafnar. Þá hefði verkalýðshreyfingin ekki fengið næg svör frá stjórnvöldum til að ákveða hvort tilefni væri til að rjúfa kjarasamninga.
Bjarni segir að samráð hafi skilað sér í ákveðnum atriðum sem til dæmis voru kynnt í Þjóðhagsráði. Það séu þó fyrst og fremst útreikningar og ýmsar greiningar.
„Samtalið sem ég hef tekið þátt í varðandi forsendubrestinn snýst allt um það að verðbólga sé utan marka. Það hefur verið beint við annars vegar VR, Landssamband verslunarmanna og fagfélögin og hins vegar við Starfsgreinasambandið og Eflingu. Þetta eru þeir sem ég hef sest niður með til að ræða forsendubrestinn sérstaklega.“
Skammtímalausn dugi ekki
Bjarni segist ekki vilja spá fyrir um hvort kjarasamningarnir haldi eða ekki en staðan hafi ekki batnað og ekki sé nóg að horfa til skemmri tíma.
„Að því leytinu til finnst mér þetta ekki eiga að snúast bara um það að setja eitthvað smyrsl á sárin tímabundið, heldur horfa til lengri tíma og skoða stöðuna af meiri alvöru og gera sér grein fyrir því að hér hafa laun almennt hækkað langt umfram framleiðnivöxt.“
