Stjórnvöld í Ísrael hafa kynnt aðgerðir gegn Bretum eftir að bresk stjórnvöld tilkynntu refsiaðgerðir gegn Ísrael í gær og sökuðu landtökufólk um þjóðernishreinsanir á Palestínumönnum. Samband ríkjanna hefur ekki verið verra í áratugi.
Ísraelsk stjórnvöld voru ekki lengi að svara fyrir sig, utanríkisráðherrann Gideon Saar kynnti mótvægisaðgerðir strax í gær.
Þau ætla meðal annars að loka ræðismannsskrifstofu Breta í Jerúsalem og vísa breskum fulltrúum á brott úr stuðningsmiðstöð fyrir Gaza sem staðsett er í suðurhluta Ísraels.
Tekist var á um refsiaðgerðirnar gegn Ísrael á breska þinginu í dag og Andy Burnham forsætisráðherra kom þeim til varnar. „Tal frá hvaða stjórnmálamanni sem er um tveggja ríkja lausn er innantómt ef ekki fylgja því aðgerðir.“
Aukin landtaka Ísraels á Vesturbakkanum, á landi sem tilheyrir Palestínu, grefur undan tveggja ríkja lausninni.
Burnham sagði forystu snúast um að grípa til aðgerða gegn óréttlæti. „Þar sem rétta þarf annarra hlut sé fólk hrakið frá heimilum sínum og búi við ögranir í daglegu lífi.“
Ed Miliband, utanríkisráðherra Bretlands, sem kynnti aðgerðirnar í gær, hefur verið sakaður um gyðingahatur. „Ég tala sem breskur gyðingur og ég tel að þeir séu margir bresku gyðingarnir sem styðja það sem við gerðum í gær.“
„Að breskir gyðingar, gyðingar hvarvetna, séu gerðir ábyrgir fyrir gjörðum ísraelskra yfirvalda er einskært gyðingahatur,“ segir Miliband.
Vel tekið í Palestínu en ekki í Ísrael
Aðgerðum Breta og reyndar ellefu annarra ríkja – þar á meðal Íslands – er vel tekið í Palestínu. „Án fælingar og án afleiðinga, án refsiaðgerða, teljum við að núverandi fasísk yfirvöld í Ísrael haldi áfram uppteknum hætti gegn þjóð okkar,“ segir Omar Awadallah, varautanríkisráðherra Palestínu.
Öðru máli gegnir um Ísrael. „Sem Ísraela er mér ekki rótt. Og eiginlega í sjokki yfir fákunnáttu fólks í Bretlandi og vona að það sjái sig um hönd,“ segir Rachelle Fine, vegfarandi í Beit Horon í Ísrael.
