Kristrún Frostadóttir hvatti þingmenn og þjóð til góðra verka í stefnuræðu sinni á Alþingi í kvöld.
„Þetta er sameiginlegt verkefni okkar, þvert á flokka. Og hvernig sem vindar blása í stjórnmálum eða í hagkerfi heimsins, þá berum við alltaf ábyrgð á eigin árangri og framtíð Íslands,“ sagði Kristrún.
Hún nýtti tækifærið til að þakka þjóðinni fyrir að svara kalli lýðræðisins í sumar með opinni umræðu sem hafi aukið meðvitund allra um stefnu og stöðu Íslands í heiminum.
Hún sagði þjóðaratkvæðagreiðsluna sigur, hvernig sem á það væri litið. Kosningaþátttaka hafi verið söguleg, með því að efna loforð til þjóðarinnar hafi gömul sár verið grædd, og að skýrari stefna Íslands um samskipti við Evrópu og umheiminn hafi verið mörkuð.
„Nú horfum við fram á veginn. Ein þjóð í einu landi. Og við sem njótum þess trausts og heiðurs að sitja á Alþingi skulum spyrja okkur við upphaf þings: Hvernig legg ég mitt af mörkum á þessum vetri til að bæta daglegt líf landsmanna og styrkja Ísland?“ spurði Kristrún.
„Sjáið hverju við höfum áorkað saman“
Hún sagði að Alþingi hefði ítrekað sýnt að saman væru þau mikils megnug þegar þau einsettu sér og ganga til verka.
„Sjáið hverju við höfum áorkað saman, sem þjóð, núna á skömmum tíma. Eftir erfið ár, heimsfaraldur og jarðhræringar og stöðnun í stjórnmálum sem ríkti um nokkurt skeið,“ sagði Kristrún og hóf upptalningu á breytingum sem hún sagði hefðu orðið til batnaðar frá því ríkisstjórnin tók við 2024.
Hún nefndi meðal annars stóruppbyggingu á hjúkrunarrýmum, fjölgun heimilislækna, tekjutengingu almannatrygginga, uppbyggingu innviða með stofnun innviðafélags, lækkun raforkureikninga í dreifbýli og stjórn á útlendingamálum.
Þá sagði Kristrún að kaupmáttur hefði aukist í öllum tekjuhópum og vanskil heimila aldrei verið minni þrátt fyrir þráláta verðbólgu, húsnæðisverð hafi farið lækkandi eftir hækkanir umfram verðbólgu árum saman, og að fyrstu kaupum á húsnæði færi fjölgandi á ný.
Kristrún sagði engin börn á biðlista eftir plássi á meðferðarheimili og að áhersla ríkisstjórnarinnar yrði áfram á velferð barna. Þannig ætli hún að mæla fyrir lagafrumvarpi um sanngirnisbætur fyrir Íslendinga sem hafi sætt óforsvaranlegri meðferð sem börn á ábyrgð hins opinbera.
„Og allt þetta hefur tekist um leið og við höfum tekið erfiðar ákvarðanir í ríkisfjármálum,“ sagði Kristrún og vísaði til hagræðingar með fækkun verkefna, ráðuneyta og ríkisstofnana og hallalausra fjárlaga næsta árs.
„Við sögðumst ætla að laga Ísland. Við erum að laga Ísland. Með því að laga fyrst grunninn. Það tekur tíma en það er að takast, og á þeim grunni getum við síðan loksins í sameiningu litið til lengri framtíðar fyrir landið okkar.“
