Hlé hefur verið gert á þingfundi vegna afhjúpunar á málverki í Alþingishúsinu af Unni Brá Konráðsdóttur, fyrrverandi þingmanni Sjálfstæðisflokksins og forseta Alþingis.
Við látum hér staðar numið og lokum fréttavaktinni en við höldum áfram að fylgja málinu eftir á miðlum okkar.
Gott kvöld.
Guðlaugur Þór Þórðarson, Sigurður Ingi Jóhannsson og Sigríður Á. Anderssen gerðu öll ýmsar athugasemdir við meirihlutaálit utanríkismálanefndar.
Guðlaugur Þór spurði Pawel hvort Ísland myndi verða hluti af sameiginlegri sjávarútvegsstefnu ESB og hann segir að hingað til hafi engin skýr svör fengist hvað hana varði.
Pawel bendir á að ákveðin sóknarfæri séu fyrir íslenskan sjávarútveg við það að ganga í Evrópusambandið en að hann líti svo á að Ísland myndi verða með sérstakt fiskveiðistjórnarsvæði.
„Þar sem myndu gilda þá sérstakar reglur og það þyrfti að tryggja að heildarúthlutun aflamarks færi þá fram fyrir tilstuðlan vísindalegrar ráðgjafar og ákvarðana íslenskra stjórnvalda og þessi atriði yrðu tryggð í aðildarsamningi.“
Pawel Bartoszek formaður utanríkismálanefndar tók fyrstur til máls í síðari umræðum um þjóðaratkvæðagreiðslu um framhald viðræðna um aðild Íslands að Evrópusambandinu.
Hildur Sverrisdóttir, þingmaður Sjálfstæðisflokksins, steig í pontu á eftir Pawel. Hún segir að mikilvægt sé að beina sjónum að samningsmarkmiðunum og þeim samningamönnum sem Ísland hyggist hafa með sér í farteskinu. Hún segir að fyrir fimmtán árum hafi verið gerðar meiri kröfur til samningamanna en í núverandi meirihlutaáliti.
Pawel svarar að í meirihlutaálitinu komi fram að mikilvægt sé að tryggja hagsmuni Íslands þegar komi að nýtingu deilistofna, eins verði leiða leitað til þess að tryggja beina aðkomu að samningaferlinu um deilistofna.
Ráðherrar ríkisstjórnarinnar sitja nú fyrir svörum þingmanna, Guðrún Hafsteinsdóttir formaður Sjálfstæðisflokksins og þingmaður Suðurkjördæmis beinir sinni fyrirspurn að Kristrúnu Frostadóttur forsætisráðherra.
Guðrún bendir á að í dag hafi Seðlabankinn hækkað stýrivexti á ný, nú standi þeir í 7,75% og verðbólga mælist 5,2%. Hún bendir á að fyrir ári síðan hafi stýrivextir lækkað úr 7,75% í 7,5%, á þeim tíma hafi hagvaxtarhorfur versnað og verðbólguvæntingar hækkað.
„Heilt ár hefur tapast, heilt ár án árangurs, heilt ár þar sem heimilin hafa greitt reikninginn fyrir stefnuleysi ríkisstjórnarinnar. Þetta er staðan sem blasir við ungu fólki sem vill eignast eigið húsnæði. Þetta er staðan hjá fyrirtækjum sem vilja ráða fólk, fjárfesta og skapa verðmæti en mæta síversnandi samkeppnisumhverfi í boði ríkisstjórnar Íslands.“
Guðrún spyr Kristrúnu hvað þurfi að gerast til þess að ríkisstjórnin hverfi á braut skattahækkana, aukinna ríkisumsvifa og innantómra fyrirheita.
Í svari sínu bendir Kristrún á að sú staða sem uppi er sé ekki ný í íslensku efnahagslífi. Hún segir ljóst að ekki sé rétt að kenna núverandi ríkisstjórn um þá stöðu sem er uppi.
„Þingmaðurinn lætur t.d. það ótalið að vextir eru enn þá töluvert lægri en þegar síðasta ríkisstjórn sprakk og verðbólga er búin að vera lægri á þessu kjörtímabili en því síðasta og nefnir ekki það sem allir vita: að við höfum fengið umtalsverðar olíuverðshækkanir í fangið á undanförnum mánuðum.“
Hún segist sjálf auðvitað ekki sátt við stöðuna, ríkisstjórnin hafi aðeins verið við störf í rúmt ár og erfi kerfi sem sé gegnumsýrt af verðtryggingu og sjálfkrafa hækkunum.
Fleiri þingmenn stigu upp í pontu og ræddu sambærileg mál.
Dagbjört Hákonardóttir þingmaður Samfylkingarinnar segir Pawel hafa sinnt sínum störfum sem formaður utanríkismálanefndar með sóma.
Sigmar Guðmundsson, þingmaður Viðreisnar, segir að mikilvægt sé að vanda til verka á þingi og það hafi Pawel sannarlega gert í sínum störfum. Hann segir að alltaf hafi verið vitað að ágreiningur yrði um málið og að Pawel hafi haldið vel utan um það og sinnt sínum störfum vel.
Pawel Bartoszek, þingmaður Viðreisnar og formaður utanríkismálanefndar, segir fjölda sérfræðinga hafa verið kallaða til á fundi nefndarinnar, alls hafi verið haldnir þrír opnir fundir.
„Fleiri held ég en í nokkru öðru þingmáli, allavega í utanríkismálanefnd, þannig að allur undirbúningur þessa máls er að mínu mati nokkuð góður.“
Pawel telur ekki að við forseta Alþingis sé að sakast í málinu, hann segist ekki sjá neitt athugavert við það hvernig málið hafi verið afgreitt. Pawel segir ljóst að málið sé umdeilt og hann hlakkar til umræðunnar sem fari fram á eftir.
Diljá Mist Einarsdóttir, þingmaður Sjálfstæðisflokksins, lýsir yfir verulegum vonbrigðum með vinnubrögð meirihluta utanríkismálanefndar. Hún segir það vera ótrúleg vonbrigði að verða vitni að því vinnufundir nefndarinnar séu felldir niður trekk í trekk, nú síðast á þriðjudag hafi fundur verið felldur niður.
„Vinnufundir sem eru skammtaðir nefndinni til þess að hægt sé að kafa dýpra ofan í mál. Ég gat ekki betur séð en aðrar fastanefndir væru hér að störfum. Við erum að fást við stærsta mál sem ég hef komið að á mínum þingferli, þó að hann hafi ekki verið langur, og mér er fyrirmunað að skilja hvernig hamagangurinn og asinn getur verið slíkur að það séu meira að segja felldir niður fyrirframskammtaðir vinnufundir nefndarinnar sem vel væri hægt að nýta til frekari úrvinnslu þessa risastóra máls.“
Segir Diljá Mist í ræðu sinni á Alþingi.
Sigmundur Davíð Gunnlaugsson, þingmaður Miðflokks, tekur undir orð fyrri ræðumanna og biðlar til forseta Alþingis að taka þeim athugasemdum sem komið hafa fram alvarlega. Hann segir að málið þurfi að afgreiða með skynsemi og þeirri vinnu sem nauðsynleg er.
Guðlaugur Þór Þórðarson, þingmaður Sjálfstæðisflokksins tekur undir orð Sigurðar. Hann vekur athygli á stærð málsins og imprar á því að þjóðin verði að vera upplýst um gang mála.
„Það sem hefur gerst, virðulegi forseti, er það að ríkisstjórnarmeirihlutinn hefur ákveðið að virða að vettugi hefðbundið verklag, verklag sem miðar að því að vanda sig. Ég er búinn að vera nokkuð lengi hér á Alþingi Íslendinga. Ég man ekki eftir því að menn hafi rifið út mál með þessum hætti, því að eftir að búið er að rífa málið út þá koma svör, seint og um síðir, en svörin koma eftir að málið er tekið út.“
Sigurður Ingi Jóhannsson, þingmaður Framsóknarflokks, segir að í dag sé stórt mál á dagskrá þingsins. Málið komi til með að hafa afdrifaríkar afleiðingar fyrir Ísland og umræðu í samfélaginu sömuleiðis. Framkvæmdarvaldið segir Sigurður hafa sett þingið í afleita stöðu. Sigurður segir að vegna tímamarka hafi formaður utanríkismálanefndar ekki haft tíma til þess að svara beiðnum minnihlutans um frekari gesti og frekari svör frá þeim aðilum sem komið hafa fyrir nefndina.
Hann segir að forseti Alþingis verði að taka upp harðari stefnu gagnvart framkvæmdarvaldinu þannig að löggjafarvaldið verði ekki sett í þá stöðu að verða einhvers konar afgreiðslustofnun.
Við fylgjumst með umræðum á þingi í dag. Síðari umræða um þingályktunartillögu vegna þjóðaratkvæðagreiðslu um ESB viðræður var á dagskrá sem og óundirbúnar fyrirspurnir. Fyrst ræddu þingmenn um fundarstjórn forseta.
