„Ef við ætlum að fara í einhverjar þreifingar þá þurfum við samt að passa að framkvæmdir stoppi ekki,“ segir Ásdís Kristjánsdóttir, bæjarstjóri í Kópavogi, um hugmyndir um breytingar á samgöngusáttmála höfuðborgarsvæðisins.
Sjálfstæðisflokkurinn í Kópavogi og Framsóknarflokkurinn í Hafnarfirði unnu sína stærstu sigra fyrr og síðar í sveitarstjórnarkosningum um helgina. Í Kópavogi fengu Sjálfstæðismenn hreinan meirihluta í fyrsta sinn en Framsóknarflokkurinn fékk þrjá menn kjörna, jafn marga og Sjálfstæðisflokkurinn. Flokkarnir geta haldið meirihlutsamstarfi sínu áfram og formlegar meirihlutaviðræður eru hafnar.
Ásdís og Valdimar Víðisson, oddviti Framsóknarflokksins og bæjarstjóri í Hafnarfirði, ræddu góðan árangur og verkefnin fram undan í Kastljósi. Talið barst meðal annars að samgöngumálum en nokkuð var rætt um þörfina á breytingum á samgöngusáttmála höfuðborgarsvæðisins í aðdraganda kosninga.
Sjálfstæðisflokkurinn í Kópavogi kallaði ekki eftir breytingum á sáttmálanum, sem var uppfærður sumarið 2024, enda er Kópavogur í fyrsta áfanga framkvæmda.
Meirihlutinn í Hafnarfirði, kallaði hins vegar eftir að samgöngubótum í Hafnarfirði yrði flýtt, nánar tiltekið kaflanum milli Lækjargötu og Kaplakrika, sem er mikill flöskuháls fyrir umferð.
Þá hefur Hildur Björnsdóttir, oddviti Sjálfstæðisflokksins í Reykjavík og líklega næsti borgarstjóri, talað fyrir endurskoðun samgöngusáttmálans. Hún vill til að mynda að Miklubrautargöng verði tekin út og sett framar í forgangsröðina, eins og hún ræddi í Silfrinu á sunnudag.
Lifandi plagg sem hefur áhrif þvert á sveitarfélög
Valdimar segir að svigrúm sé fyrir breytingar innan núverandi sáttmála. En hefðu breytingar í einu sveitarfélagi ekki áhrif á önnur?
„Jú, vissulega upp á fjármögnun og annað að gera,“ segir hann. „En hins vegar verðum við samt að horfa á þennan samgöngusáttmála sem lifandi plagg. Aðstæður og forsendur breytast og bæjarfélögin eru með skipulagsvaldið. Það sem við í Hafnarfirði erum að tala fyrir er ákveðinn tappi á höfuðborgarsvæðinu, í raun fyrir allt höfuðborgarsvæðið, frá Lækjargötu að Kaplakrika. Þar er í raun stopp sem hægir á allri umferð á höfuðborgarsvæðinu.“
Valdimar áréttar að hann sé ekki að kalla eftir heildarendurskoðun, heldur endurskoðun á ákveðnum þáttum. Hann viðurkennir þó að það geti verið örðugt að flýta tvennum stórframvæmdum samtímis.
„Vissulega, en það sem við í Hafnarfirði erum að tala fyrir er tappi sem hægir á allri umferð á höfuðborgarsvæðinu. Við erum að tala um allt að 95 prósent farþega sem koma til landsins keyri í gegnum Hafnarfjörð og þennan litla vegbút.“
Heildarendurskoðun ávísun á stopp
Ásdís segir að Kópavogsbær hafi eðlilega skoðun á öllum breytingum sem kunni að hafa áhrif á sveitarfélagið.
„Ég held að allir höfuðborgarbúar finni að við viljum liðka fyrir umferð, hvort sem fólk er gangandi, hjólandi eða í strætó. Við þurfum að gera þetta skynsamlega. Ef við ætlum í einhverja heildstæða endurskoðun – og ég veit að Valdimar er ekki að tala fyrir því – er hættan sú að við séum aftur komin í algjört stopp á þessu kjörtímabili, með tilheyrandi kostnaði.“
Hún kveðst þó ekki hafa áhyggjur af því að farið verði fram á of miklar breytingar, þar sem það væri það mjög óskynsamlegt.
„Að sjálfsögðu á þetta að vera lifandi plagg, enda er þetta langtímasáttmáli. En að fara í heildstæða endurskoðun held ég að sé ekki raunhæft og væri í raun bara til þess fallið að tefja framkvæmdir enn frekar.“
