„Þeir munu hengja mig“ - Vísir

„Þeir munu hengja mig,“ er Pútín sagður hafa sagt við sína nánustu ráðgjafa, samkvæmt heimildum Economist.

Sókn Rússa í Úkraínu hefur gengið mjög hægt á undanförnum mánuðum en hún hefur gengið og þá sérstaklega í Dónetsk-héraði. Það hérað, ásamt Lúhansk sem Rússar stjórna að fullu, myndar Donbas-svæðið svokallaða.

Úkraínumenn stjórna enn hluta Dónetsk en það svæði þykir mjög víggirt. Þar eru nokkrar borgir og bæir sem Úkraínumenn hafa byggt upp miklar varnir í í gegnum árin og er svæðið kallað „virkisbeltið“.

Þá hafa bæði Úkraínumenn og Rússar bætt miklu púðri í árásir á innviði og önnur skotmörk djúpt í löndunum tveimur, með því markmiði að valda sem mestum efnahagslegum skaða.

Heimildarmenn Economist segja að Pútín hafi á undanförnum vikum velt stöðunni varðandi innrásina verulega fyrir sér. Í stað þess að reyna að binda enda á stríðið er hann sagður hafa tekið þá ákvörðun að bæta í.

Forsetinn er sagður ætla að reyna að senda þrjú til fjögur hundruð þúsund hermenn til viðbótar á víglínuna. Almenna herkvaðningin sem Pútín boðaði árið 2022 er tæknilega séð enn í gildi og stendur til að nota hana til að finna nýja hermenn.

Úkraínumenn hafa um nokkuð skeið haft áhyggjur vegna ummerkja þess að Rússar ætluðu sér að framkvæma nýja herkvaðningu.

John Ratcliffe, yfirmaður Leyniþjónustu Bandaríkjanna (CIA), ferðaðist til Moskvu í mánuðinum, þar sem hann mun hafa varað ráðamenn í Rússlandi við því að hella olíu á eldinn hvað varðar Úkraínu. Ratcliffe er sagður hafa lagt til við Rússa að þeir kæmu að viðræðum af alvöru.

Sjá einnig: Er sagður hafa lagt spilin á borðið varðandi Úkraínu

Economist hefur eftir ráðgjafa Pútíns til langs tíma að forsetinn sé líklegur til að hafa talið heimsóknina til marks um veikleika í Bandaríkjunum. Það hafi hann gert í lok árs 2021, þegar Bill Burns, fyrrverandi yfirmaður CIA, fór til Moskvu og varaði Rússa við því að ráðast inn í Úkraínu.

Þremur mánuðum síðar hófu Rússar innrásina.

Pirraðir auðjöfrar

Einn heimildarmaður miðilsins segir að meðal rússneskra auðjöfra sé mikil beiskja vegna stríðsrekstursins. Efnahagur Rússlands hefur orðið fyrir miklum skaða og árangurinn hefur verið slæmur. Auðjöfrum þykir þetta hafa staðið yfir of lengi.

Annar sagði sífellt fleiri auðjöfra sjá það að „keisarinn sé nakinn“.

Forsetinn leggur þó mikla áherslu á það að sýna ekki veikleikamerki. Nokkrir heimildarmenn Economist sögðu Pútín telja að ef hann myndi binda enda á stríðið án þess að tryggja yfirráð Rússlands yfir Donbas-svæðinu, yrði hann ráðinn af dögum.

Pútín hefur sagt nokkrum af sínum nánustu ráðgjöfum að hann yrði hengdur.

Um helgina líkti Pútín stríðinu í Úkraínu við fæðukeðjuna og nefndi að háhyrningar ætu Hvítabirni. Það þyrfti að kenna börnum, svo þau lærðu hvernig heimurinn virkaði.

Ekki er vitað til þess að háhyrningur hafi nokkurn tímann étið hvítabjörn.