Sindri Freyja Bjarnabur, sem oft er kölluð Sindri Sparkle, segist alltaf finnast hún þurfa að gera lítið úr ofbeldi sem hún verður fyrir. Hópur ungra manna reyndi að kasta steini í hana þegar hún var á leið úr gleðigöngunni í gær.
„Ég er náttúrulega grínisti, þannig að þegar eitthvað svona kemur upp þá hef ég alltaf bara reynt að finna húmorinn í því. En á sama tíma þá er ég náttúrulega bara aftur og aftur að muna, já, þetta var bara hálfur metri og já, hefði getað farið miklu verr,“ segir Sindri Freyja sem notar bæði fornöfnin hún og hán.
Sá steininn splundrast
Hún og maðurinn hennar fóru snemma heim úr gleðigöngunni í gær og stoppuðu á leiðinni fyrir framan gamla heimilið sitt í Sæmundargötu. Sindri segist hafa verið í eigin heimi að hugsa um tíma þeirra saman í íbúðinni.
„Þegar ég allt í einu heyri manninn minn, Joe, öskra nafnið mitt og síðan sé ég stein splundrast við hliðina á mér.“
Sindri segir fimm menn hafa kastað steininum um hálfum metra frá höfði hennar. Hún telur engin vitni hafa verið á staðnum að frátöldum manninum hennar sem hringdi á lögregluna. Sindri segir lögregluna hafa hljómað eins og hún ætlaði sér ekki að aðhafast í málinu.
Sjö tilkynningar um líkamsárásir bárust lögreglunni á höfuðborgarsvæðinu í gærkvöld og í nótt. Lögregla segir ekkert benda til þess að árásirnar tengist hinsegin dögum.
Flutt á bráðamóttöku eftir barsmíðar
Eir Þórudóttir Fjölnisdóttir, sem er trans kona, var flutt á bráðamóttöku á föstudagskvöld eftir að þrír íslenskir menn á þrítugsaldri réðust á hana.
Eir var að ganga í Austurstræti rétt fyrir miðnætti þegar hún kom auga á vinkonu sína, sem er líka trans, og menn sem voru að áreita hana. „Ég er búin að fá mér í glas, er kannski orðin aðeins of djörf og blanda mér í málið, reyni að verja hana, kannski ögra þeim of mikið,“ segir hún.
Vinkonurnar fóru svo inn í 10/11 og sáu að mennirnir biðu eftir þeim fyrir utan verslunina. Þegar þær gengu úr búðinni segir Eir þær hafa reynt að hunsa þá en þeir elt þær. „Þeir hrópa á eftir mér, kalla mig fagga og ég reyni að hunsa þá. Þeir fara svo að toga í jakkann minn til að reyna að ögra mér meira en ég hunsa þá. Svo finn ég fyrir höggi aftan á höfuðið á mér,“ segir Eir.
Sá einn með hníf í hendi
„Ég er svo lamin í andlitið nokkrum sinnum á meðan þeir halda áfram að kalla mig fagga. Þeir hættu þegar þeir tóku eftir því að vinkona mín væri að hringja í 112. Þá fóru þeir í burtu. Samkvæmt vinkonu minni þá var einn þeirra með hníf í hendi.“
Vinkona Eirar fór með hana á bráðamóttökuna. Hún er ekki alvarlega slösuð en bólgin, aum og smá skelkuð. „Miðað við allt slapp ég bara sæmilega. Auðvitað hefði verið skárra að vera ekki lamin en þetta hefði getað farið verr.“
Á bráðamóttökunni gaf Eir lögregluskýrslu. Hún segist ekki vera búin að kæra árásina en það sé næsta skref.
„Þetta er dæmi um það að Pride er enn þá mjög nauðsynlegt.“
Nauðsynlegt að lögreglan geri betur
Sindri Freyja segir ofbeldi og hatursglæpi gegn hinsegin fólki hafa stigmagnast á síðustu árum. Hún segist vita að lögreglan geri sitt besta en þó sé nauðsynlegt að gera betur.
„Ég gleymi aldrei þegar ég vakna, sé að það er búið að skera niður alla fána á Hellu og síðan nokkrum mínútum seinna kemur lögreglan fram og segir: „Nei, þetta er ekki hatursglæpur af því að það voru fleiri skemmdarverk framin“ eins og það stoppi þetta frá því að vera hatursglæpur.“
Ofbeldi gegn hinsegin fólki hér á landi hafi sérstaklega stigmagnast frá árinu 2020 þegar innflutt hatursorðræða fór að skjóta rótum.
„Þetta byrjaði náttúrulega engan veginn 2020. Það hefur verið vaxandi bylgja alveg síðan 2016. 2020 er árið þar sem að sem þetta verður sýnilegra og ég held að það sé að miklu leyti vegna þess að þá er farið ráðist á fánann. Fánar eru tákn yfir hópa af fólki og ef þú getur ekki ráðist á manneskjuna, af því að það er of mikið af fólki með þeim í liði, þá ræðstu bara á táknin þeirra,“ segir Sindri Freyja.
Það er enginn trans Páll Óskar
Með vaxandi hatri í garð hinsegin fólks verði auðveldara að ráðast á fólkið líka. Hún segist hafa lent í mörgum atvikum líkt og árásinni í gær. Henni sé reglulega ógnað og öskrað sé á hana á götum úti.
„Ég er heppin að vera með rödd. Ég sem leikari, sem grínisti er í stöðu þar sem ég get talað upphátt og fólk heyrir það. En það er náttúrlega afskaplega lítið af trans fólki í auga samfélagsins, sem að náttúrlega, það er bara enginn, þú veist, trans Páll Óskar.“
Sindri Freyja segist lengi hafa reynt að sannfæra fólk um að fordómar gegn hinsegin fólki á Íslandi séu raunverulegir og hættulegir. Margir vilji láta eins og hatursorðræða hafi engar raunverulegar afleiðingar.
„Ég á svolítið erfitt með umræðuna sem er í gangi akkúrat núna. Hún er svo mikið byggð á því að ákveðið fólk þykist ekki vita hver hættan er á að tala svona, segir bara þetta er bara mín skoðun og eitthvað þannig. En tilvistarréttur verður að trompa það, af því að það er ekki hægt að mætast í miðjunni þegar kemur að lífi fólks.“
