Ásdís Kristjánsdóttir, bæjarstjóri í Kópavogi, segir að það hafi komið henni á óvart hversu mikil afskipti Kristrún Frostadóttir forsætisráðherra hafði af sveitarstjórnarkosningunum í bænum. Það hafi ekki verið forsætisráðherra sæmandi.
Sjálfstæðisflokkurinn bætti við sig miklu fylgi í bænum, fékk 45,7% atkvæða og sex bæjarfulltrúa af ellefu. Þetta er í fyrsta sinn sem Sjálfstæðismenn eru með hreinan meirihluta í bæjarstjórn Kópavogs.
Kristrún Frostadóttir tók virkan þátt í baráttu Samfylkingarinnar, ekki síst í Kópavogi og nýtti meðal annars tækifærið í ræðu sinni á verkalýðsdaginn, 1. maí, til að gagnrýna stefnu Sjálfstæðisflokksins í Kópavogi í leikskólamálum.
Samfylkingin bætti við sig fylgi í bænum, en það dugði þó skammt.
„Kópavogsbúar eru stoltir og ánægðir með sína þjónustu og kunna ekki að meta að forsætisráðherra skuli tala svona niður okkar bæjarfélag,“ segir Ásdís.
Styður samgöngusáttmálann
Útlit er fyrir að sjálfstæðisflokkurinn verði í meirihluta í öllum sveitarfélögum á höfuðborgarsvæðinu.
Ásdís boðar enga kúvendingu í samgöngumálum. Hún segir Sjálfstæðisflokkinn í Kópavogi standa við bakið á samgöngusáttmálanum, þar á meðal borgarlínuna.
„Samgöngusáttmálinn er til hagsbóta fyrir okkur og þar eru mikilvægar samgöngubætur,“ segir Ásdís. Hún nefnir Fossvogsbrúna, sem tengir Reykjavík og Kópavog, og Arnarnesveginn.
Hún segir flokkinn þó ekki standa fyrir því að þrengt sé að bílaumferð. „Skipulagsvaldið er hjá okkur og við munum ekki þrengja að neinum valkosti.“
Kemur í ljós hvort flokkurinn verði einn í meirihluta
Sjálfstæðisflokkurinn hefur síðasta kjörtímabil starfað í meirihluta með Framsóknarflokknum.
„Við fundum það að Kópavogsbúar eru ánægðir með þjónustu bæjarins, sorphirðan er í lagi, snjómoksturinn er í lagi. Við höfum verið að lækka álögur á Kópavogsbúa og þetta skiptir Kópavogsbúa máli,“ segir Ásdís.
Flokkurinn fær nú hreinan meirihluta og þarf því ekki á samstarfi við aðra flokka að halda. Hún vill ekki segja til um það hvort samstarfinu við Framsókn verði engu að síður haldið áfram.
„Næstu dagar fara í að eiga samtöl við mitt teymi, minn hóp og við ætlum bara að njóta dagsins í dag. Svo verðum við bara að bíða og sjá.“
