Robert Kuzovkov, sem gekk undir dulnefninu Semyon Skrepetsky, var skotinn til bana um hábjartan dag í pólska bænum Biala Podlaska, um þrjátíu kílómetra frá landamærum Póllands að Belarús.
Skopmyndateiknarinn var þekktur fyrir gagnrýni sína og háðsádeilu á Vladímír Pútín, forseta Rússlands, að því er segir í frétt evrópska blaðsins Politico.
Karlmaður á ferugsaldri var handtekinn, grunaður um morðið á Kuzovkov. Hann var með georgískt vegabréf, að sögn lögreglu í Lublin-héraði og Donald Tusk, forsætisráðherra.
Tusk sagði í gær að allt benti til þess að drápið á Kuzovkov hafi verið pólitískt launmorð. Yfirvöld væru þó enn að safna sönnunargöngum og vísbendingum um það.
„Ef það kemur í ljós að Rússland hafi staðið að þessari árás væri litið á það sem ríkishryðjuverk,“ sagði Tusk sem sagði síðar á samfélagsmiðli að leitað væri að þeim sem skipuðu fyrir um morðið.
Lífshættulegt að hallmæla Pútín
Fjöldi andófsmanna og andstæðinga Pútíns hefur látist við voveiflegar aðstæður á undanförnum árum, bæði innan og utan Rússlands.
Fyrir sex árum skaut rússneskur útsendari fyrrrverandi uppreisnarmann frá Téténíu til bana um hábjartan dag í almenningsgarði í Berlín. Morðingjanum var sleppt í umfangsmestu fangaskiptum á milli Rússlands og vestrænna ríkja frá því að kalda stríðinu lauk. Pútín tók fagnandi á móti honum við komuna til Rússlands.
Þá eitruðu rússneskir útsendarar fyrir Alexander Litvinenko, rússneskum fyrrverandi leyniþjónustumanni, með geislavirku efni í London árið 2006. Þeim tókst að ráða Litvinenko bana.
Rússnesku leyniþjónustumönnunum sem eitruðu fyrir Sergei Skripal, öðrum fyrrverandi njósnara, og dóttur hans í Salisbury á Englandi árið 2018 tókst aftur á móti ekki ætlunarverk sitt. Þeim tókst þó að drepa breska konu sem komst í snertingu við leifarnar af taugaeitrinu sem þeir beittu í tilræðinu og skildu eftir á víðavangi.
Einnig er talið að rússnesk stjórnvöld hafi staðið fyrir því að eitrað var fyrir Alexí Navalní, leiðtoga rússnesku stjórnarandstöðunnar, árið 2020. Hann lést í rússnesku fangelsi árið 2024.
