Sameinuðu þjóðirnar segja að mikill niðurskurður á fé, stríðsátök og upplýsingaóreiða ýti undir hættu á að fjölmörg börn séu ekki bólusett. Það geti valdið því að faraldrar brjótist út.
Nýjar tölur frá Alþjóðaheilbrigðisstofnuninni og UNICEF gefa til kynna að 90% barna hafi fengið minnst einn skammt af bóluefni við barnaveiki, stífkrampa og kíghósta í fyrra og 85% barna hafi fengið þá þrjá skammta sem taldir eru nauðsynlegir. Þetta er aukning um eitt prósentustig frá árinu áður en þó lægra hlutfall en 2019, áður en heimsfaraldurinn skall á.
Catherine Russell framkvæmdastjóri UNICEF segir í yfirlýsingu að þetta þýði að milljónir barna í viðkvæmri stöðu séu enn óvernduð vegna átaka, heimilisleysis og fátæktar.
„Ekkert barn ætti að veikjast af sjúkdómi sem einfalt bóluefni getur komið í veg fyrir,“ segir hún. Samkvæmt tölunum fengu 13,5 milljónir barna á fyrsta aldursári ekkert bóluefni á síðasta ári.
Sameinuðu þjóðirnar segja þeim börnum fjölga sem byrjað er að bólusetja samkvæmt áætlun en ljúka ekki bólusetningunni.
Í skýrslunni kemur meðal annars fram að 7,3 milljónir barna eru talin hafa fengið fyrsta skammt af bóluefni við barnaveiki, stífkrampa og kíghósta en ekki fyrsta skammt af bóluefni gegn mislingum.
Kate O'Brien, yfirmaður bólusetningarmála hjá Sameinuðu þjóðunum, segir ástæðuna vera rangar upplýsingar um bóluefni gegn mislingum. Það sé mikið áhyggjuefni. Dregið hafi úr bólusetningum sem leitt hafi til þess að mislingafaraldur greindist í 57 löndum á síðasta ári.
O'Brien bendir líka á að almennt sé meira um sjúkdómsfaraldra núna, til dæmis barnaveiki og kóleru. Þetta séu fyrstu áhrifin af niðurskurði á þróunaraðstoð, einkum frá Bandaríkjunum. Þessi áhrif eigi eftir að koma enn frekar í ljós.
„Þessir faraldrar gefa þegar til kynna göt í bólusetningarkerfinu,“ segir hún.
