Maður vopnaður tveimur eldhúshnífum réðst á þrjár konur á götu í París á mánudag áður en vegfarendur og lögreglumaður sem var á frívakt náðu að yfirbuga hann.
Tvær kvennanna særðust alvarlega og voru í lífshættu eftir árásina. Á myndbandi sem tekið var eftir að maðurinn hafði verið yfirbugaður heyrist hann segja að Allah hafi skipað sér að fremja verknaðinn.
Árásin átti sér stað um klukkan 11:30 að staðartíma í norðurhluta Parísar. Konurnar þrjár eru 19, 24 og 36 ára og voru allar fluttar á sjúkrahús.
Laurent Nunez, innanríkisráðherra Frakklands, sagði tvær þeirra hafa verið í lífshættu. Önnur var stungin í mjóbakið en hin í kviðinn. Ein kvennanna er sögð hafa verið barnshafandi.
Vegfarandi felldi árásarmanninn með ferðatösku
Kheira Dellabed, 54 ára þjónustukona sem varð vitni að árásinni, sagðist hafa verið að vaska upp þegar hún sá manninn ganga fram hjá vopnaðan tveimur hnífum.
„Við sáum mann ganga fram hjá með tvo hnífa og stinga þrjár manneskjur,“ sagði Dellabed.
Að hennar sögn greip ungur vegfarandi þá inn í og sló manninn með lítilli ferðatösku þannig að hann féll til jarðar.
Þjónn á veitingastað í nágrenninu kom síðan til aðstoðar og hélt stól ofan á manninum. Lögreglumaður sem var á frívakt tók þátt í að yfirbuga hann og handtók hann.
Á öðru myndskeiði sést maðurinn liggja á jörðinni í haldi viðstaddra en hnífarnir tveir liggja skammt frá á gangbraut.
„Allah skipaði mér það“
Á myndbandi sem tekið var meðan maðurinn lá yfirbugaður á jörðinni heyrist hann segja á frönsku:
„Það var Allah sem skipaði mér það.“
Yfirvöld hafa þó varað við því að draga ályktanir um ástæður árásarinnar á þessu stigi.
Ekki lá strax fyrir hver maðurinn væri eða hvað hefði vakað fyrir honum samkvæmt yfirvöldum, þrátt fyrir ummæli hans.
Árásin kemur skömmu eftir mannskæða árás á Pride göngu í Berlín, þar sem maður, sem þýsk yfirvöld þekktu vegna íslamskrar öfgahyggju, ók sendibíl inn í mannfjölda. Ein kona lést og 29 særðust í þeirri árás.
BREAKING:
Mass-stabbing attack in France.
A man has been arrested after randomly stabbing 3 women on the streets of Paris. Some of the victims have life-threatening injuries. pic.twitter.com/UlWXcorvkG
— Visegrád 24 (@visegrad24) July 27, 2026
