Á sama tíma og mörg - jafnvel flest - Evrópuríki herða aðgerðir til að hindra komu flóttafólks og ólöglegra innflytjenda og einfalda og flýta brottvísun þeirra sem þegar eru komin fara stjórnvöld á Spáni í hina áttina og veita um hálfri milljón manns sem dvelja og vinna í landinu án tilskilinna leyfa tímabundið - en endurnýjanlegt - dvalarleyfi.
Hlusta má á umfjöllun Spegilsins um þetta í spilaranum hér að neðan, eða lesa hana áfram þar fyrir neðan.
Nýir tímar í Ungverjalandi - nema fyrir flóttafólk og innflytjendur
Ungverjar kusu sér nýtt þing og þar með nýja ríkisstjórn með nýjum forsætisráðherra á dögunum. Úrslitum þingkosninganna hefur víða verið fagnað, einkum í Evrópusambandinu.
Sagt er að það marki þáttaskil, að í stað öfga-hægrimannsins Viktors Orbáns sé kominn annar og lýðræðisvænni maður í brúna, tilbúinn að moka út úr spillingarfjósi Orbáns, leysa fjölmiðla, menntastofnanir og listamenn úr hlekkjum ritskoðunar, dómstóla undan pólitískri misbeitingu, og færa samskiptin við Evrópusambandið og aðildarríki þess í fyrra horf.
Það er engin ástæða til að efast um að stórsigur Péters Magyar, fyrrverandi samherja Orbáns, í ungversku þingkosningunum, marki upphaf róttækra breytinga - jafnvel umbóta - í ungverskum stjórnmálum, hverjar sem þær kunna að verða. Eitt mun þó ekki breytast - í það minnsta ekki í þá átt sem einhver hefðu kannski haldið - og það er stefna ungverskra stjórnvalda í málefnum flóttafólks, hælisleitenda og ólöglegra innflytjenda.
Evrópa lokar landamærunum en Spánverjar opna faðminn
Stjórn Orbáns rak afar harða stefnu í þessum málaflokki, sem miðaði að því að hleypa sem fæstum úr þessum hópum inn í landið og koma sem flestum sem þar voru út úr því aftur. Af orðum Magyars að dæma hyggst hann í engu slaka á í þessum efnum, heldur taka upp enn harðari stefnu en forveri hans, eins og fram kom í umfjöllun Spegilsins á dögunum.
Það er í fullu samræmi við þróun þessa málaflokks víðast hvar í Evrópu og reyndar Evrópusambandinu sem slíku. Líka í þeim löndum sem stjórnað er af flokkum sem gjarnan kenna sig við félags- og efnahagslegan jöfnuð, réttlæti og mannúð, svo sem Bretland, Danmörku og Ísland.
Eitt Evrópuríki sker sig þó úr, og það er Spánn. Ekki er nóg með að spænsk stjórnvöld láti það ógert að fjölga steinum í götu þeirra inn í Spán og herða sig við að bola þeim burt, heldur hyggjast þau létta þeim lífið til muna.
Yfir 500.000 ólöglegum innflytjendum býðst að verða löglegir
Samkvæmt tilskipun ríkisstjórnar sósíalistans Pedro Sanchez, sem samþykkt var í liðinni viku, býðst nefnilega rúmlega 500.000 ólöglegum innflytjendum sem þegar búa og vinna á Spáni, dvalar- og atvinnuleyfi sem gildir í eitt ár - og er endurnýjanlegt. Umsækjendur þurfa þó að uppfylla ákveðin skilyrði; sýna fram á að þeir hafi komið til landsins fyrir síðustu áramót, hafi búið þar í minnst fimm mánuði - og séu með hreint sakavottorð. Fólk, sem sótti um hæl fyrir síðustu áramót, getur líka sótt um þetta endurnýjanlega árs-dvalarleyfi.
Þetta er ekki í fyrsta skipti sem spænsk stjórnvöld opna landamærin fyrir fjöldaflutninga fólks til landsins, en það eru yfir tuttugu ár frá því að eitthvað þessu líkt var gert síðast. Franska fréttastofan AFP segir að rekja megi tilskipunina til áskorunar sem undirrituð var af yfir 700.000 manns og studd af hundruðum hreyfinga, félagasamtaka og stofnana, þar á meðal kaþólsku kirkjunni.
Stórt „svart“ hagkerfi mannað ólöglegum innflytjendum
Spánn hefur um áratugaskeið þurft að reiða sig á erlent vinnuafl í fjölmennustu atvinnugreinunum. Meirihluti þessa fólks er löglegur í landinu, en hundruð þúsunda eru það ekki, heldur lifa og starfa í því sem kallað er neðanjarðar- eða svarta hagkerfinu, vinnandi í ræstingum, byggingariðnaði, landbúnaði, verslunum, veitingastöðum, hótelum og heilbrigðisþjónustu svo það helsta sé nefnt.
Stór hluti þessa vinnuafls kemur frá fyrrum nýlendum Spánar í Rómönsku Ameríku og Norður-Afríku, segir í umfjöllun AFP/France 24, svo sem Venesúela, Kólumbíu, Ekvador og nágrannaríkinu Marokkó.
Og þótt við tengjum fréttir af ólöglegum innflytjendum til Spánar helst við myndskeið af fólki sem freistar þess í örvæntingu að klifra yfir gaddavírsgirðingarnar sem umlykja spænskar hólmlendur í Marokkó og sökkvandi manndrápsfley undan ströndum Kanaríeyja, segir þar, þá koma langflestir þessara "ólöglegu" innflytjenda löglega inn í landið eins og hverjir aðrir túristar, en ílendast svo. Dvelja þar lengur en vegabréfsáritunin leyfir og finna sér misilla - eða misvel - launaða vinnu á gráa svæðinu, svarta hagkerfinu, sem skilar engu í sameiginlega sjóði landsmanna.
Viðurkenning á tilvist fólks og hagkvæmt fyrir samfélagið
Sanchez segir í opnu bréfi að tilskipunin feli einfaldlega í sér viðurkenningu á tilvist fólks í landinu, „sem gegnir nú þegar sínu hlutverki í daglegu lífi [Spánverja]“ með því að sinna umönnun aldraðra, starfa í landbúnaðargeiranum og byggja upp blómleg fyrirtæki. Hann bendir á að innflytjendur FRÁ Spáni hafi löngum flykkst til annarra landa og að landinu bæri siðferðisleg skylda til þess að taka innflytjendum opnum örmum, rétt eins og aðrir hefðu tekið Spánverjum. Þetta snerist þó ekki bara um siðferði, heldur líka skynsemi og hagkvæmni.
Spánverjar, rétt eins og aðrar Evrópuþjóðir, væru að eldast, sagði hann, „og ef við tökum ekki inn nýtt fólk til að vinna og leggja sitt af mörkum til almannatryggingakerfisins, þá mun velmegun okkar minnka, getu okkar til nýsköpunar hnigna og almannaþjónustan - heilbrigðisþjónustan, lífeyriskerfið, menntunin - mun versna," skrifar forsætisráðherrann, sem benti á að innflytjendur ættu stóran þátt í styrkingu spænska efnahagskerfisins síðustu ár.
Ekki allir jafn hrifnir
Kaþólska kirkjan - sem seint mun teljast til heitra fylgjenda Sósíalistaflokksins - fagnar tilskipun stjórnarinnar, sem gefin er út í nafni konungs. Hinn íhaldssami Flokkur fólksins - sem lagði svipaða tillögu fram á spænska þinginu fyrir tveimur árum eða svo - gerir það ekki, heldur hyggst freista þess að hnekkja tilskipuninni fyrir dómstólum. Flokkurinn segir þetta ganga gegn samevrópskri samstöðu í þessum málaflokki og til þess fallið að "flytja innflytjendavandamálið út til Evrópusambandsins alls."
Og Santiago Abazcal, leiðtogi fjar-hægri þjóðernissinnaflokksins VOX, var á svipuðum nótum þegar hann hét því að láta Sanchez gjalda þess að veita innflytjendunum dvalarleyfi í stórum stíl. „Þjóðin," sagði hann, „mun ekki fyrirgefa það.“
