Það verður brakandi blíða víða um land næstu daga og fram yfir helgi ef marka má spákort Veðurstofunnar. Þar eru fjólubláar tölur yfir landinu austan- og norðaustanverðu, sem þýðir að hitinn fari vel yfir tuttugu stig.
Júlí er almennt annasamur á tjaldsvæðum víða um land, en tjaldverðir sem eiga von á mestu blíðunni hafa vart haft undan að taka við bókunum í morgun. Á tjaldsvæðinu á Egilsstöðum er aðalsvæðið að verða fullbókað. Á tjaldsvæðinu Fljótsdalsgrund við Hengifoss stefnir eins í stærstu útileguhelgi ársins.
„Það er svona ríflega helmingur stæðanna upptekinn orðinn. Svoleiðis að ég er hræddur um að þetta verði bara kaós og ægilega fínt“, segir Hörður Már Guðmundsson, tjaldvörður á tjaldsvæðinu Fljótsdalsgrund við Hengifoss. „Það er að bætast við mjög hratt bara núna.“
Hörður segir því ekki seinna vænna að fólk fari að bóka sér stæði, ætli það að sleikja sólina á tjaldsvæðum þar sem hitinn verði mestur.
Best norðaustan til og ekki víst að það sjáist mikið til sólar í Reykjavík
Íslendingar eru auðvitað þekktir fyrir að elta veðrið og því hvílir mikið á herðum veðurfræðinga. Enn eru nokkrir dagar fram að helgi - heldur spáin eða ekki?
„Þetta er nokkuð stöðugt, það er háþrýstisvæði yfir Bretlandseyjum og Evrópu sem viðheldur þessari stöðu, svo það er ekki mikilla breytinga að vænta“, sagði Þorsteinn V. Jónsson, veðurfræðingur í hádegisfréttum útvarps í dag.
Veðrið verði best á Austurlandi, Norðausturlandi og Austfjörðum. Lægðirnar koma hins vegar hver á fætur annarri upp að Vesturlandinu næstu daga með tilheyrandi vætu og hita í kringum 10-12 stig.
Spurður hvenær höfuðborgarbúar megi vænta þess að sjá næst til sólar, sagði veðurfræðingur að veðrið þar yrði líklega svipað næstu vikuna.
