Sorg ríkir í Shreveport, 180.000 manna borg í Louisiana, eftir fregnir af grimmdarverkum manns á fertugsaldri í gær. Hann skaut átta börn til bana og særði eitt. Börnin voru á aldrinum þriggja til ellefu ára. Hann skaut einnig tvær konur, sem komust af. Önnur þeirra var eiginkona hans.
Árásarmaðurinn var faðir allra barnanna sem hann myrti nema eins. Það var frændsystkini hinna.
Lögregla skaut árásarmanninn til bana eftir ódæðisverkin. Hann flýði af vettvangi á stolnum bíl. Árásirnar voru gerðar á þremur stöðum og er talið að maðurinn hafi verið einn að verki.
Þetta er mannskæðasta skotárás í Bandaríkjunum frá 2024. Byssuofbeldi í landinu er það algengasta í heimi meðal þróaðra ríkja og þúsundir eru myrtar ár hvert. Á þessu ári hafa verið gerðar hundrað og fjórtán fjöldaskotárásir, hið minnsta. Það er skilgreint sem fjöldaskotárás þegar fjórir eða fleiri eru skotnir, að árásarmanni undanskildum.
