Sláturtíð hefst eftir nokkrar vikur og Kjarnafæði Norðlenska á von á ríflega 100 erlendum farandverkamönnum til vinnu á Húsavík. Sláturtíðinni fylgir mikið umfang en fyrirtækið sér um að útvega starfsfólkinu húsnæði meðan á sláturtíðinni stendur. Hópurinn setur svip sinn á bæjarlífið á Húsavík.
„Undirbúningur er hafinn fyrir nokkru síðan. Við byrjum hreinlega að hugsa um þetta í febrúar. Það er svona 70-80% af þeim sem hafa komið áður til okkar. Það eru bæði sérhæfð störf og almenn störf og við erum heppin með það að fólk kemur ár eftir ár bæði í þessi sérhæfðu og almennu störf,“ segir Jóna Jónsdóttir, mannauðsstjóri Kjarnafæðis Norðlenska.
Þarf sérstakt atvinnu- og dvalarleyfi fyrir Breta
Stærstur hluti verkamannanna kemur frá Mið-Evrópu og Bretlandi. Bretar voru í meirihluta áður fyrr en eftir að þeir gengu úr Evrópusambandinu þarf að sækja um sérstakt atvinnu- og dvalarleyfi fyrir þá. Að mati Jónu væri ekki hægt að slátra án erlends vinnuafls.
„Nei, ég held að það væri erfitt. Ég held það. Það er náttúrulega lítið atvinnuleysi á Íslandi, almennt, sem betur fer. Við höfum verið ánægð með það held ég. Þetta er tímabundin vinna þannig að fólk er kannski ekki að hlaupa frá öðrum störfum til að koma. Það eru alltaf einhverjir Íslendingar milli starfa sem koma en stóri hlutinn er mannaður erlendis frá og fólk sem kemur ár eftir ár eins og ég segi. “
