Jónas Atli Gunnarsson, hagfræðingur hjá Húsnæðis-, mannvirkja- og skipulagsstofnun (HMS), segir að það gerist sjaldan að fasteignamat lækki að raunvirði á milli ára. Minni hækkun miðað við síðastliðin ár skýrist af kólnun sem hefur orðið á fasteignamarkaði.
„Þá skiptir litlu máli hvaða fasteigna við erum að líta til, hvort sem er íbúðir, atvinnueignir eða sumarhús. Þetta eru hækkanir sem halda varla í við verðbólgu,“ segir hann.
Fólksfjölgun á Vestfjörðum skýri hækkun þar
Fasteignamat fyrir 2027 var kunngjört í dag. Það hækkaði um 2,1% milli ára en lækkaði að raunvirði.
„Það hafa komið köld og heit ár ef maður getur orðað það svo. Við hækkuðum lítið fyrir tveimur árum síðan en síðan kom rýmingin í Grindavík sem hafði mikil áhrif á fasteignamarkaðinn þannig að aftur hækkaði fasteignamat í fyrra. En það gerist sjaldan að fasteignamat lækki að raunvirði,“ segir Jónas Atli.
Mest var hækkunin á Vestfjörðum en Jónas segir það skýrast af aukinni eftirspurn á svæðinu. „Við höfum séð mikla fólksfjölgun á Vestfjörðum.“
Hann bendir einnig á að þegar húsnæðisverð er lágt þarf lítið til að það hækki mikið í prósentum talið. „Það hefur líka áhrif.“
Minni og hóflegar hækkanir
Fasteignamat atvinnueigna og sumarhúsa hækkar meira milli ára en fasteignamat íbúðahúsnæðis.
Jónas Atli bendir á að íbúðamarkaðurinn sé virkari og sveiflist meira eftir markaðsaðstæðum. Þróunin sé öðruvísi hjá atvinnueignum og sumarhúsum því færri kaupsamningar liggi þar að baki.
„Því hefur þróunin ekki verið nákvæmlega sú sama en mér finnst stóra myndin vera að við sjáum minni og hóflegar hækkanir í öllum þessum hópum,“ segir hann.
