Gamall strætisvagn, eins konar verslun á hjólum, sem ferðast um bæi sem taka á móti skemmtiferðaskipum gerir eigendum heilsársverslana erfitt fyrir, segir Árný Rós Gísladóttir, verslunareigandi á Ísafirði.
Árný rekur verslunina Litlu netagerðina á Ísafirði. Hún segir komu skemmtiferðaskipa í Ísafjarðarhöfn yfir sumartímann skipta sköpum fyrir verslunareigendur í bænum. Þá skjóti það skökku við hversu auðvelt það sé fyrir verslunareigendur sem koma í bæinn á háannatíma að afla sér tilskilinna leyfa og stunda viðskipti tímabundið, í samanburði við þá sem vilji opna þar heilsársverslanir.
Glatað að sjá einhverja aðra „fleyta rjómanum af“
Árný Rós var gestur í Morgunútvarpi Rásar 2 í morgun. Þar ræddi hún Facebook-færslu sem hún birti á dögunum um strætisvagninn sem fengið hefur leyfi til að selja minjagripi til farþega skemmtiferðaskipa.
„Ég setti þennan skemmtilega status sem voru bara mínar hugleiðingar. Það var aldrei ásetningurinn hjá mér að taka á móti þessu fólki með heygaflana á lofti en þetta fékk mig til að hugsa að þetta væri pínu glatað fyrir okkur hin að sjá einhverja aðra koma og fleyta rjómanum af og ekki vera búsett í bænum,“ segir Árný.
Hún segir það hafa vakið upp ýmsar spurningar að sjá strætóinn í bænum, meðal annars vegna þess hversu erfiðlega það hafi gengið fyrir önnur fyrirtæki að fá starfsleyfi frá bænum.
Ég hugsaði um þau leyfi sem við erum búin að vera að reyna að fá. Samskiptin við bæinn hafa gengið erfiðlega og reglugerðin hefur verið mjög snúin og flókin,“ segir Árný.
„Og ég veit líka um annað tilfelli í bænum þar sem maður var búinn að innrétta og mála strætó til að vestfirskir hönnuðir fengju að selja í honum. Hann fékk ekki stöðuleyfi, hefði þurft að standa kyrr í einhverja mánuði, og það dæmi gekk ekki upp. Þess vegna var ég svolítið foj þegar ég sá að það væri hægt að gefa leyfi fyrir þessum tiltekna strætó.“
Árný segist ekki efast um það að strætóinn hafi fengið starfsleyfi og segir starfsemina góða og gilda. Hins vegar sé mikilvægt að bæjarbúar fái einnig tækifæri til þess að auglýsa bæinn og hvað hann hefur upp á að bjóða, ásamt því að njóta góðs af komu skemmtiferðaskipanna.
„Við viljum alveg taka á móti fólki sem vill gera eitthvað skemmtilegt hérna, það er ekki það. Við erum alveg opin og hress með það en það voru þessar leyfisveitingar og það setti mig út af laginu. Og síðan er þetta pínu glatað fyrir okkur hin sem erum að reyna að reka fyrirtæki yfir allt árið. Það er verið að borga húsaleigu og laun og allt sem því fylgir, og svo er einhver sem getur komið og gert svona.“
