Ekkert í dómi Landsréttar í hryðjuverkamálinu svokallaða kallar á endurskoðun á ákvæðum almennra hegningarlaga um hryðjuverk.
Þetta segir Sveinn Andri Sveinsson lögmaður í samtali við mbl.is en hann er verjandi Sindra Snæs Birgissonar sem var sýknaður af ákæru um tilraun til hryðjuverka í Landsrétti í síðustu viku. Hann hlaut þó 18 mánaða fangelsisdóm fyrir stórfelld vopnalagabrot.
Grímur Grímsson, þingmaður Viðreisnar, var yfirlögregluþjónn hjá rannsóknardeild lögreglunnar á höfuðborgarsvæðinu þegar rannsókn á málinu hófst. Hann sagðist vera þeirrar skoðunar að endurskoða þyrfti hryðjuverkaákvæðin í viðtali við Morgunblaðið í dag.
Dæmigerð kerfisviðbrögð
„Þetta eru kannski svona dæmigerð kerfisviðbrögð og það er verið að afvegaleiða umræðuna að mínu mati. Það er bara ekkert í dómi Landsréttar sem kallar á að endurskoða þurfi það hryðjuverkaákvæði,“ segir Sveinn Andri spurður út í tillögu Gríms.
Segir Sveinn Andri að hryðjuverkaákvæðið hafi verið tekið upp í íslensk lög að danskri fyrirmynd en að smávægilegar breytingar hafi þó verið gerðar á því eftir gagnrýni frá Jónatani Þórmundssyni, lagaprófessor emeritus, og Evrópuráðinu. Þær breytingar hafi þó ekki haft neitt að segja í dómi Landsréttar.
Dómur Landsréttar sneri að sögn Sveins Andra ekki að neinu leyti að því hvort ákvæði hegningarlaganna hefði verið fullnægjandi refsigrundvöllur.
„Þessi ummæli eru fullkomlega óskiljandi. Málið snýst einfaldlega um sönnun og það reynir þarna á tilraunarákvæði hegningarlaganna, hvort það teljist sannað að tilraun hafi verið til staðar. Það var niðurstaða Landsréttar að tilraun til hryðjuverka væri ósönnuð.“
Áfellisdómur yfir lögreglunni
Að mati Sveins Andra er dómur Landsréttar áfellisdómur yfir lögreglunni.
„Á þessum fræga blaðamannafundi fullyrtu fulltrúar lögreglunnar það að landsmönnum hefði verið bjargað frá hryðjuverki. Dómur Landsréttar segir hins vegar að það hafi alls ekki verið svo. Að menn skuli ekki hafa kjark til að segja að þetta hafi verið rangt mat og biðjast afsökunar og tekið gagnrýni áfrýjunardómstóls til sín er mikið áhyggjuefni.“
Ríkissaksóknari hefur ekki tekið ákvörðun um það hvort sótt verði um áfrýjunarleyfi til Hæstaréttar í málinu. Hæstiréttur hefur áður tekið málið til sín en í mars ómerkti þetta æðsta dómstig landsins fyrri sýknudóm Landsréttar.
Sveinn Andri segir nýjan dóm Landsréttar vera mjög ítarlegan og tekið hafi verið tillit til þeirra atriða sem gagnrýnd voru þegar Hæstiréttur ómerkti fyrri dóminn. Hann telur því ólíklegt að áfrýjunarleyfi fáist að nýju ef um það verður sótt á annað borð. Málið sé þó löngu hætt að koma honum á óvart.
