Karl Bretakonungur hefur greitt yfir þrjátíu milljónir punda, eða rúmlega fimm milljarða íslenskra króna, í skatta frá því hann varð konungur í september 2022.
Karl birti skattskýrslu sína í dag og er fyrsti konungborni þjóðhöfðinginn í Bretlandi sem gerir það.
Vilhjálmur sonur hans gerði slíkt hið sama. Hann hefur greitt yfir 20 milljónir punda, eða ríflega þrjá milljarða íslenskra króna, í skatta frá því hann varð prins af Wales.
Konungshöllin segir að það hafi verið persónuleg ákvörðun feðganna að birta skattskýrslur sínar. Það er sagt liður í því að auka gagnsæi. Frekari útlistun á því hvernig skattarnir voru reiknaðir hefur ekki verið gefin upp. Þó kemur fram á vef BBC að konungurinn hafi greitt skatta í hæsta skattþrepi.
Karl Bretakonungur fær tekjur af landareign sinni í hertogadæminu Lancaster sem hann getur notað hvort sem er í opinberum eða einkaerindum. Tekjur af landareigninni á skattaárinu 2025-26 námu 25,2 milljónum punda, eða því sem nemur um 4,2 milljörðum króna.
Þá hefur hann skattskyldar tekjur af eigin fjárfestingum, sparnaði og landareignum í einkaeigu, þ.e. Balmoral og Sandringham.
Fjármál konungsfjölskyldunnar hafa verið gagnrýnd, sérstaklega eftir að fjármál Andrew Mountbatten-Windsor, fyrrum Bretaprins, komust í kastljós fjölmiðla.
Átta milljón króna lestrarferð
Í gögnunum kemur einnig fram að dýrasta opinbera heimsókn krúnunnar erlendis var þriggja daga ferð Vilhjálms prins til Sádí Arabíu í febrúar síðastliðnum. Ferðin kostaði því sem nemur 21,7 milljónum íslenskra króna.
Lítið ódýrari var fjögurra daga ferð konungshjónanna til Ítalíu í apríl. Hún kostaði andvirði 21,2 milljóna króna.
Þá kostaði ferð Karls í konunglegu lestinni til Lancaster í júní 2025 rúm 48 þúsund pund, eða um átta milljónir króna. Taka á lestina úr notkun í síðasta lagi árið 2027, til hagræðingar.
Á síðastliðnu ári fór konungsfjölskyldan svo í 177 þyrluferðir sem samtals kostuðu 733 þúsund pund, eða um 122,5 milljónir króna.
Í frétt BBC segir að opinber fjárframlög til konungsfjölskyldunnar, sem standa straum af rekstrarkostnaði krúnunnar, verði aukin á næstu árum. Fyrir þremur árum námu framlögin 51,8 milljónum punda árlega en frá og með rekstrarárinu 2027-28 verða þau 99,9 milljónir punda, eða um 16,7 milljarðar íslenskra króna.
