Marta Kos, stækkunarstjóri Evrópusambandsins, segir Ísland hafa sérstöðu í aðildarviðræðum vegna þess að landið er hluti af bæði Evrópska efnahagssvæðinu og Schengen-svæðinu.
„Sum af sérkennum Íslands, sérstaklega sjávarútvegur og landbúnaður, eru svo einstök að það þarf að taka sérstaklega tillit til þeirra,“ segir Kos í samtali við Politico. Hún er sannfærð um að hægt sé að finna „skapandi lausnir“ sem bæði ESB og Íslendingar geti fellt sig við.
Hún telur að aðildarviðræður gætu tekið eitt til tvö ár ef Íslendingar samþykkja að halda viðræðum áfram í þjóðaratkvæðagreiðslunni 29. ágúst.
Komi til þess að Ísland gangi í sambandið er talið líklegt að aðildarríkin fullgildi umsóknir Íslands og Svartfjallalands á sama tíma. Það er talið styrkja umsóknir beggja ríkja vegna þess að Ísland myndi greiða meira til sambandsins en það fengi. Svartfjallaland yrði aftur á móti eitt af fátækari aðildarríkjum.
Hyggst ráða samningamann ef viðræðum verður framhaldið
Þorgerður Katrín Gunnarsdóttir utanríkisráðherra segir við Politico að Ísland sé í betri stöðu en í síðustu viðræðum til að ná samningi sem stendur vörð um íslenskan sjávarútveg, landbúnað og náttúruauðlindir.
Í viðtali við breska blaðið Financial Times í gær sagði Þorgerður að íslensk stjórnvöld geri kröfu um „fullveldisyfirráð yfir öllum sjávarútvegi“ komi til aðildarviðræðna.
Þorgerður segir að sérstakur samningamaður verði ráðinn til að sinna samningaviðræðum við Brussel ef þjóðin samþykkir áframhald viðræðna. Hún segir samningamanninn þurfa að geta „sameinað þjóðina“ og að hann verði ekki ráðinn innan úr utanríkisráðuneytinu.
Í morgun birtu Samtök fyrirtækja í sjávarútvegi greiningu um áhrif aðildar á íslenskan sjávarútveg. Samtökin telja það nauðsynlegt að Ísland standi utan sameiginlegrar sjávarútvegsstefnu ESB. Því sé mikilvægt að fyrir liggi hvað felist í framsali yfirráða yfir fiskveiðiauðlindinni áður en kosið verður um áframhaldandi aðildarviðræður.
