Sólveig Anna Jónsdóttir, formaður Eflingar, segir stéttarfélagið lengi hafa barist fyrir því að tekið verði á vandamálum sem plagi ræstingageirann. Hún segir stórt framfaraskref stigið með nýjum drögum að viðmiðum fyrir ræstingarútboð ríkisinssem fjármála- og efnahagsráðuneytið vann í samráði við Eflingu.
Í nýjum viðmiðum er meðal annars kveðið á um að ríkið megi segja upp ræstingaþjónustu komi í ljós að brotið sé á réttindum starfsfólks og gerð krafa um viðurkennda og gagnsæja uppmælingu á verkinu. Þá er fyrirtækjum sem ríkið semur við gert að skrifa undir yfirlýsingu um að réttur starfsfólks verði virtur.
Útboð ríkisins stór hluti vandamálsins
„Þetta eru öll atriði sem skipta alveg rosalega miklu máli til að koma þessum geira, ræstingageiranum, á stað sem við öll sem byggjum þetta samfélag getum sætt okkur við,“ segir Sólveig Anna.
Hún segir framkvæmd á útboðum ríkisins hafa átt veigamikinn þátt í vandamálum innan ræstingageirans. Þau hafi hingað til ekki tekið tillit til vinnuaðstæðna ræstingafólks.
„Þá hafa lægstu tilboðin verið valin án þess að gengið hafi verið úr skugga um að vinnuaðstæður fólksins sem vinnur svo vinnuna hafi verið viðunandi. Og þetta hefur búið til kerfi sem hefur gengið út á það að láta ræstingafólkið vinna hraðar og hraðar án þess að það fái greitt í samræmi við það sem kallað er aukinn vinnuhraði.“
Eina samkeppnin milli fyrirtækja í opinberum útboðum hafi þar af leiðandi verið um hver geti látið starfsfólk vinna hraðast.
Vonar að atvinnurekendur standi ekki í vegi fyrir umbótum
Sólveig segist bjartsýn á að viðmiðin eigi eftir að skila árangri. Grunnatriði þeirra séu lykillinn að því að uppræta vandamálin sem hafi fylgt ræstingageiranum.
„Ég auðvitað vona af öllu hjarta að fulltrúar atvinnurekenda átti sig á því að þetta sé algjört lykilatriði til þess að vinna að mjög mikilvægum umbótum á íslenskum vinnumarkaði og reyni ekki að standa í vegi fyrir því að þetta nái í gegn,“ segir hún.
Viðmiðin voru birt í samráðsgátt á fimmtudaginn. Þar segir að markmið viðmiðanna sé að stuðla að auknu gagnsæi, samræmi og gæðum við framkvæmd ræstingaútboða ríkisins og stuðla að ábyrgum innkaupum.
Verkalýðshreyfingin fullyrti í fyrra að þrátt fyrir að sérstök áhersla hefði verið lögð á að bæta stöðu ræstingafólks við gerð kjarasamninga hefði ekki verið staðið við það í öllum tilvikum og aðbúnaður ekki alltaf verið eins og hann ætti að vera.
