Að minnsta kosti 624 bandarískir hermenn hafa særst og 18 látist frá því Donald Trump fyrirskipaði árásir á Íran í febrúar. Þetta kemur fram í nýuppfærðum tölum frá bandaríska varnarmálaráðuneytinu, Pentagon.
Í apríl undirrituðu Bandaríkin og Íran vopnahléssamkomulag en þrátt fyrir samninginn hafa árásir haldið áfram linnulaust og vopnahlé ítrekað verið rofið. Þann 7. júlí hófust þó átökin aftur af fullum þunga og 8. júlí lýsti Donald Trump því svo yfir að vopnahléinu væri lokið. Samninganefndir ríkjanna gætu áfram rætt saman en að hans mati væru þær einungis að sóa tíma sínum.
Talan hækkuð og svo lækkuð
Samkvæmt nýjum tölum Pentagon sem birtar voru um helgina létu 18 bandarískir hermenn lífið í hernaðaraðgerðinni „Epic Fury,“ eða innrás Bandaríkjanna í Íran. Sú tala var þó leiðrétt stuttu eftir birtingu og sagt að einungis 14 hafi í raun fallið í þeirri aðgerð, en fjórir til viðbótar í „öðrum aðgerðum erlendis“ frá og með 7. júlí.
Bandarísk stjórnvöld hafa verið harðlega gagnrýnd fyrir að hafa með þessum hætti skipt átökunum upp í tvö aðskilin tímabil þrátt fyrir að um sé að ræða eitt og sama stríðið. Ben Hodges, fyrrverandi hershöfðingi sem stýrði herafla Bandaríkjanna í Evrópu í fyrri forsetatíð Trumps, er meðal gagnrýnenda.
„Ríkisstjórnin virðist eiga í verulegum erfiðleikum með að vera heiðarleg um hvað er í gangi, ekki bara varðandi mannfall, heldur um allt stríðið almennt,“ segir Hodges.
Tímabundin truflun á gögnum
Sean Parnell, talsmaður Pentagon, sagði í færslu á samfélagsmiðlinum X að misræmið mætti rekja til tímabundinnar truflunar á gögnum og að unnið væri að úrlausn málsins í samstarfi við herdeildirnar.
Flokkurinn „aðgerðir erlendis“ birtist í fyrsta sinn á vef Pentagon á sunnudag. Þrír bandarískir hermenn létu lífið eftir flugskeytaárásir á herstöð í Jórdaníu þann 17. júlí og annar hermaður lést í drónaárás á vegum Írana í Írak.
Ekki hafa verið gerðar neinar árásir frá því á föstudag.
