Félagasamtökin Rótin hafa kært ákvörðun Sjúkratrygginga Íslands til úrskurðarnefndar um upplýsingamál. Sjúkratryggingar synjuðu aðgangi að hluta upplýsinga í samningi þeirra við SÁÁ. Kristínu I. Pálsdóttur, framkvæmdastýru Rótarinnar, finnst ekki standast að hagsmunir SÁÁ séu teknir fram yfir upplýsingarétt almennings.
„Ástæðan fyrir því að við viljum sjá þessa samninga er að við viljum vita hvernig kerfi þetta er sem við erum með. Hvernig er verið að nýta fjármuni í þessu kerfi, hvað er verið að semja um og slíkt,“ sagði hún í útvarpsþættinum Sögur úr raunveruleikanum á Rás 1 á dögunum.
Rótin beitir sér fyrir hagsmunum kvenna og kvára með fíknivanda og hefur um árabil gagnrýnt margt við SÁÁ – meðal annars meðferðir og þær hugmyndir sem starfsemin er byggð á. Þá hefur Rótin hvatt stjórnvöld til að endurskoða samninga sína við SÁÁ.
Sjúkratryggingar sömdu við SÁÁ til fjögurra ára í desember. Rótin telur að upplýsingarnar í samningnum hafi ríka þýðingu fyrir almenning, fjölmiðla og aðhald með stjórnsýslunni. Kristín bendir á að meðferð SÁÁ sé greidd af almannafé að stærstum hluta og að um 80 prósent þeirra fjármuna sem ríkið ver í meðferðarúrræði utan Landspítala renni til þeirra.
Þegar Rótin fékk samning SÁÁ og Sjúkratrygginga afhentan vantaði þó ýmislegt í hann.
„Þá er búið að strika út, sverta allar upplýsingar sem varða kostnað. Það er ekki ein einasta upphæð í samningnum og líka ýmislegt um meðferðartíma og grundvallarupplýsingar um meðferð. Okkur þykir þetta mjög óeðlilegt,“ segir Kristín.
